الماتى قالاسىنىڭ اسكەري-تەحنيكالىق مەكتەبىندە 1941-1945 جىلدارداعى ۇلى وتان سوعىسىنىڭ باتىرى، گۆارديا ستارشيناسى ىسقاق ۋالييەۆتى ەسكە الۋعا ارنالعان «ەشكىم دە، ەشتەڭە دە ۇمىتىلمايدى» اتتى پاتريوتتىق اكسيا ءوتتى.
شاراعا اسكەري-تەحنيكالىق مەكتەپتىڭ كۋرسانتتارى، باتىردىڭ نەمەرەلەرى مەن شوبەرەلەرى، «اتامنىڭ اماناتى» قوعامدىق بىرلەستىگىنىڭ تەڭ قۇرىلتايشىسى نازىم ارزىمبەتوۆا قاتىستى.
ىسقاق ۋالييەۆ 1902 جىلى باتىس قازاقستان وبلىسىندا دۇنيەگە كەلگەن. سوعىس كەزىندە ول 238ء-شى اتقىشتار ديۆيزياسىنىڭ 94ء-شى گۆارديالىق اتقىشتار پولكىندە قىزمەت ەتتى. ول باسقارعان مەرگەندەر بولىمشەسى شايقاستاردا بىرنەشە رەت ەرەكشەلەندى. باتىر ەكى مارتە «قىزىل جۇلدىز» وردەنىمەن جانە «ەرلىگى ءۇشىن» مەدالىمەن ماراپاتتالعان.
1943 جىلى قازاقستاننان شىققان قىزىل اسكەردىڭ ەرلىگى مەن باتىلدىعى تۋرالى رەسپۋبليكالىق «سوسياليستىك قازاقستان» گازەتىندە ماقالا جارىق كوردى. ال 1944 جىلدىڭ مامىر ايىندا ۇلى جەڭىسكە ءبىر جىل جەتپەي، ىسقاق ۋالييەۆ مايداندا العان جاراقاتىنان كوز جۇمىپ، كالينين وبلىسىنا جەرلەنەدى. مايدانگەردىڭ ارتىندا ايەلى مەن ءتورت بالاسى قالدى.
شارا كەزىندە «اتامنىڭ اماناتى» قوعامدىق بىرلەستىگىنىڭ نەگىزىن قالاۋشى نازىم ارزىمبەتوۆا ىسقاق ۋالييەۆتىڭ نەمەرەلەرىنە ۇلى وتان سوعىسى جىلدارىنداعى قازاق جاۋىنگەرىنىڭ ەرلىكتەرى تۋرالى ماقالالارى بار مايداندىق گازەتتەردى تابىس ەتتى.
باتىردىڭ نەمەرەسى ەرجانوۆا مادينا ۇيىمداستىرۋشىلارعا ءوز العىسىن ءبىلدىرىپ، اسكەري-تەحنيكالىق مەكتەپتىڭ كۋرسانتتارىنا ءوز ءىسىنىڭ بىلىكتى مامانى، پاتريوت جانە ەلىمىزدىڭ سەنىمدى قورعاۋشىسى بولۋدى تىلەدى.