وقۋشىلار وزدەرى ۇلگى تۇتاتىن تۇلعالارمەن كەزدەستى.
ەلدىڭ ءار وڭىرىندە ادام ومىرىنە اراشا ءتۇسىپ، اجالدان قۇتقارعان مەكتەپ وقۋشىلارىن وقۋ-اعارتۋ ءمينيسترى عاني بەيسەمبايەۆ استاناعا شاقىردى، دەپ حابارلايدى اlmaty-akshamy.kz وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
بۇگىن ەلورداعا اتىراۋ، قاراعاندى، قىزىلوردا، سولتۇستىك قازاقستان جانە تۇركىستان وبلىستارىنان 11 وقۋشى كەلدى. ولار توتەنشە جاعداي كەزىندە باتىل ارەكەت جاساپ، ونداعان ادامنىڭ ءومىرىن ساقتاپ قالدى. باتىر بالالاردىڭ ەڭ كىشكەنتايى – سەگىز جاسار نۇريدەن امانتاي. ول ءورت ورتاسىنان قارىنداسىن امان الىپ شىقتى. ءامىرحان اباي، نۇربولات ەرماعامبەت جانە سۇلتان مالقادجار سۋعا باتىپ بارا جاتقان دوسىن قۇتقارسا، توعىز جاسار جانسەرىك ءالىم ءورت كەزىندە قارىنداستارى مەن ىنىسىنە كومەك كورسەتتى. ورازالي زينوللايەۆ، سايان ەسپۋل، مارال گانييەۆ جانە نۇرپولات نۇركەلدى بالالاردى سۋدان الىپ شىقتى.
بالالاردى وقۋ-اعارتۋ ءمينيسترى عاني بەيسەمبايەۆ العىس حاتتارمەن ماراپاتتادى.
«ادام ءومىرىن قۇتقارۋ - ۇلكەن ەرلىك. ءبىزدىڭ مەكتەپ وقۋشىلارىنىڭ اراسىندا وزگەلەرگە ۇلگى بولارلىق وجەت، ەرجۇرەك، باتىل بالالاردىڭ بار ەكەندىگى ماقتانىش. وسىنداي ازاماتتار تاربيەلەگەنى ءۇشىن اتا-انالارىڭىز بەن مۇعالىمدەرىڭىزگە العىس ايتامىن»، - دەدى عاني بەيسەمبايەۆ.
كەزدەسۋگە ق ر ەڭبەك سىڭىرگەن قايراتكەرى سۆەتلانا ايتبايەۆا، ق ر ەڭبەك سىڭىرگەن سپورت شەبەرى، وليمپيادا چەمپيونى سەرىك ساپييەۆ، قازاقستاندىق دزيۋدوشى جانە سامبيست رۋسلان سەيلحانوۆ قاتىستى. باتىر بالالار مەن ولاردىڭ اتا-انالارىنا مينيستر العىس حات، ەنسيكلوپەديا، سپورتتىق جابدىقتار جانە لاگەرگە جولدامالار تابىستادى.
وقۋشىلار سونداي-اق استانانىڭ كورىكتى جەرلەرىن ارالادى، وزدەرى ۇلگى تۇتاتىن تۇلعالارمەن كەزدەستى. ولاردىڭ قاتارىندا بوكستان الەم چەمپيونى جانە قازاقستان ۇلتتىق قۇراماسىنىڭ فۋتبولشىلارى بار.