پرەزيدەنت جارلىعى شىقتى.
ۇلتتىق ۆاليۋتا – تەڭگەنىڭ اينالىسقا ەنگىزىلگەنىنە 30 جىل تولۋىنا ارنالعان مەرەكەلىك مەدالدى بەكىتۋ تۋرالى پرەزيدەنت جارلىعىنىڭ جوباسى جاريالاندى، دەپ حابارايدى اlmaty-akshamy.kz.
«قازاقستان رەسپۋبليكاسىنىڭ ۇلتتىق ۆاليۋتاسى – قازاقستان تەڭگەسىنىڭ اينالىسقا ەنگىزىلگەنىنە 30 جىل تولۋ قۇرمەتىنە قاۋلى ەتەمىن:
- «تەڭگەگە 30 جىل» مەرەكەلىك مەدالى تاعايىندالسىن.
- قوسا بەرىلىپ وتىرعان:
1) «تەڭگەگە 30 جىل» مەرەكەلىك مەدالىمەن ناگرادتاۋ قاعيدالارى؛
2) «تەڭگەگە 30 جىل» مەرەكەلىك مەدالىنىڭ سيپاتتاماسى بەكىتىلسىن»، - دەلىنگەن پرزيدەنت جارلىعىنىڭ جوباسىندا.
قۇجاتتا كورسەتىلگەندەي، مەرەكەلىك مەدالدى مىنا لاۋازىمداعى تۇلعالار مەملەكەت باسشىسىنىڭ اتىنان تابىستاۋعا قۇقىلى:
- ۇلتتىق بانك ءتوراعاسى؛
- ۇلتتىق بانك ءتوراعاسىنىڭ ورىنباسارلارى؛
- ۇلتتىق بانك فيليالدارىنىڭ، ۇلتتىق بانكتىڭ الماتى قالاسىنداعى تۇراقتى وكىلدىگىنىڭ جانە ۇلتتىق بانك ۇيىمدارىنىڭ ءبىرىنشى باسشىلارى؛
- ۇلتتىق بانكتىڭ ءتوراعاسى ايقىندايتىن ۋاكىلەتتى تۇلعالار.
«مەرەكەلىك مەدالمەن ق ر ۇلتتىق ۆاليۋتاسى – قازاقستان تەڭگەسىنىڭ جانە ق ر قارجى جۇيەسىنىڭ دامۋىنا جانە نىعايۋىنا، ق ر مەملەكەتتىلىگىنىڭ قالىپتاسۋىنا جانە الەۋمەتتىك-ەكونوميكالىق دامۋىنا ەلەۋلى ۇلەس قوسقان ق ر ازاماتتارى جانە شەتەل ازاماتتارى ناگرادتالادى»، - دەلىنگەن «اشىق» نقا پورتالىندا جاريالانعان قۇجاتتا.
پرەزيدەنت جارلىعىنىڭ جوباسى 21 ساۋىرگە دەيىن كوپشىلىك تالقىلاۋدا بولادى. كەيىن قول قويۋ ءۇشىن مەملەكەت باسشىسىنا جولدانادى.