جوعارعى باس قولباسشى ءوزىنىڭ قازاقستان حالقىنا ارناعان «ادىلەتتى قازاقستان ەكونوميكالىق باعدارى» جوداۋىندا ەلىمىزدىڭ قارۋلى كۇشتەرىنىڭ جوعارعى باس قولباسشىسى مەملەكەتتىڭ ۇلتتىق قاۋىپسىزدىگىن قامتاماسىز ەتۋ ءۇشىن قورعانىس- ونەركاسىپ كەشەنىن جان- جاقتى نىعايتۋ قاجەتتىگىنە باسا نازار اۋداردى.
جولداۋدا قارۋ- جاراق پەن اسكەري تەحنيكانىڭ يمپورتتىق جەتكىزىلىمدەرىنە تاۋەلدىلىكتى ازايتۋ ءۇشىن لوكاليزاسيانىڭ جوعارى ۇلەسى بار ءوندىرىس سيكلىن قۇرۋ ماڭىزدى مىندەت بولىپ وتىر.
تەحنيكانى شۇعىل جوندەيتىن ءوندىرىس ورىندارىنىڭ قۋاتىن ارتتىرىپ، وتاندىق كاسىپورىندارعا بارىنشا قولداۋ كورسەتكەن ءجون. بىزدە وعان قاجەتتى ماتەريالدار- تەحنيكالىق بازا، بىلىك پەن تاجىريبە جانە ماماندار بار. تەك ولارعا قۇزىرلى مەكەمەلەردىڭ تاپسىرىسى كەرەك.
زاماناۋي تەحنولوگيا ترانسفەرتىن جاساۋ جانە جاڭا وزگەرىستەر اشۋ جۇمىسىن جالعاستىرعان ءجون.
ارناۋلى قورعانىس- ونەركاسىپ كەشەنىن دامىتۋ قورى ارقىلى ءوز كاسىپورىندارىمىزعا تىكەلەي قارجىلىق قولداۋ كورسەتىلەدى،- دەپ اتاپ ءوتتى ەل قورعانىسى جونىندە پرەزيدەنتىمىز قاسىم-جومارت كەمەل ۇلى توقايەۆ.
وسىلايشا ەلىمىزدىڭ جوعارعى باس قولباسشىسى اينالامىز الاساپىران بولىپ جاتقان كەزدە ەلىمىزدىڭ قاۋىپسىزدىگىن نىعايتىپ، قورعانىس سالاسىن كۇشەيتۋدىڭ وتە قاجەتتى قادام ەكەندىگىن ناقتىلاپ بەردى.
ەل قاۋىپسىزدىگىنىڭ باستى سالاسىنىڭ ءبىرى ۇلانعايىر جەرى بار مەملەكەتىمىزدىڭ شەكارا كۇزەتى. قازىرگى تاڭدا ەلىمىزدىڭ مەملەكەتتىك شەكاراسىن كۇزەتۋ مەملەكەت باسشىسىنىڭ سىندارلى ساياساتىنىڭ ارقاسىندا زاماناۋي جاڭارتىلعان تەحنيكالاردىڭ كومەگىمەن كۇزەتىلىپ كەلەدى. جىل سايىن جەلدىڭ وتىندە، ەلدىڭ شەتىندە شەكارا كۇزەتىندە جۇرگەن شەكاراشىلاردىڭ شەكارا شەبىن شەگەندەۋدە وزدەرىنىڭ كاسىبي بىلىكتىلىكتەرىن جوعارى دەڭگەيدە شىڭداۋمەن قاتار، جاڭا وزىق تەحنولوگياداعى شەكارا كۇزەتىنە ارنالعان قۇرال- جابدىقتارمەن قامتاماسىز ەتىلىپ كەلە جاتقاندىعىن ايتا كەتكەن ءجون. ءبىراق سوعان قاراماستان مەملەكەتتىك شەكارا كۇزەتىندە جۇرگەن شەكاراشىلاردىڭ دا وزىندىك پروبلەمالارى بارشىلىق. ەندى، مىنە، جوعارعى باس قولباسشىنىڭ حالىققا ارناعان سىندارلى جولداۋىنان كەيىن شەكاراشىلاردىڭ دا ءتۇيىنى شەشىلمەي جاتقان كەيبىر ماسەلەلەرىنىڭ دە كۇن تارتىبىنەن ءتۇسىپ، وڭتايلى ىستەر اتقارىلا بەرەتىنى ءسوزسىز.
.