قازىرگى قۋىرشاق تەاترى – جان-جاقتىلىعىمەن وزگەشەلەنگەن، جاڭاشا فورماتتار مەن باتىل قادامداردىڭ، تىڭ جاڭالىقتاردىڭ ورداسى. الماتى قالاسى مادەنيەت باسقارماسىنىڭ مەملەكەتتىك قۋىرشاق تەاترى - قازىرگى تاڭدا ءۇزىلىسسىز جۇمىس جاسايتىن رەسپۋبليكا بويىنشا جالعىز تەاتر.
كورەرمەن تالعامى مەن سۇرانىسىنا ساي جۇمىس جاسايتىن تەاتر ۇجىمى ءوز كورەرمەندەرىنە ارنالعان پرەمەرالارى مەن ونلاين فورماتتاعى تانىمدىق جوبالارىن قازىرگى قالىپتاسقان ەپيدەميولوگيالىق جاعدايدا دا ساقتىق شارالارىن قاتاڭ ساقتاي وتىرىپ ۇسىنىپ كەلەدى. ولاردىڭ قاتارىندا قازاق حالىق ەرتەگىلەرىمەن قاتار، ءتۇرلى ۇلت وكىلدەرىنىڭ ۇزدىك تۋىندىلارىن تالعاممەن تاڭدالعان «بالالارعا بازارلىق»، «قايىرلى ءتۇن، بالاقاي!»، «ەرتەگىلەر اپتالىعى»، شىنايى ەڭبەككە شاقىراتىن «ۇيرەن دە، جيرەن، بالاقاي!»، سالاۋاتتى ءومىر سالتىن ۇستانۋعا شاقىراتىن «تاڭعى جاتتىعۋ جاسايىق!» سىندى ايدارلار - الەۋمەتتىك جەلى وقىرماندارىنىڭ سۇرانىسىنا يە تۋىندىلار.
ەرەسەكتەرگە ارنالعان قويىلىمدار قاتارىندا ميلليونداعان تىڭدارمانداردىڭ جۇرەگىنەن ارداقتى ورىن العان كورنەكتى كومپوزيتور، قازاق ەستراداسىنىڭ نەگىزىن سالۋشى ءشامشى قالداياقوۆتىڭ 90 جىلدىق مەرەيتويىنا وراي «ءومىر – وزەن» مۋزىكالىق تەاترلاندىرىلعان قويىلىمى تۇڭعىش جول تارتتى. تەاتر الەمىنە قۋىرشاق ونەرىن قابىستىرا بايلانىستىرعان ۋ.شەكسپيردىڭ «ماكبەت» تراگەدياسى دا ادامنىڭ ىشكى ارپالىس سەزىمدەرىن، نازىك تە تىلسىم پسيحولوگيالىق كۇشتەردى، فيلوسوفيالىق ويلار مەن بۇگىنگى كۇندە دە ماڭىزىن جوعالتپاعان ماسەلەلەردى شەبەر بەينەلەگەن قويىلىم رەتىندە كورەرمەندەر مەن كاسىبي سىنشىلاردان جوعارى باعاسىن الدى. تەاتر رەپەتۋارى جاس كورەرمەندەردى كوپشىلدىككە، مەيىرىمدىلىككە جەتەلەيتىن ورىس حالىق ەرتەگىسى «ۇيشىك»، كىشىپەيىلدىلىك پەن تازالىققا، ماقساتشىلدىق پەن عاجايىپقا ۇندەيتىن «كۇلشە قىز»، كوڭىلدى اۋەن ىرعاعىندا مۋزىكانىڭ العىشارتتارىن ۇيرەتەتىن تانىمدىق باعىتتاعى «قاسقىر مەن جەتى لاق»، ۇلتتىق نانىم-سەنىمدەر، سالت-داستۇرلەردەن كورىنىس بەرەتىن «ەر توستىك» قويىلىمدارىمەن تولىقتى. 2020 جىلدىڭ قورىتىندىسى بويىنشا، «حالىقارالىق تەاتر سىنشىلارى بىرلەستىگى» سارالاعان رەسپۋبليكا تەاترلارى اراسىندا «باق-پەن ۇزدىك جۇمىس جاساعان تەاتر»، «ونلاين فورماتتاعى ەڭ ۇزدىك تەاتر»، سونىمەن قاتار «ۇزدىك بالالارعا ارنالعان قويىلىم – «ۇيشىك» سپەكتاكلى» نوميناسيالارىمەن ماراپاتتالدى.
اتاۋلى كۇندەر مەن ارناۋلى مەرەيتويلاردى دا نازاردان تىس قالدىرمايتىن تەاتر ۇجىمى 30 تامىز – قازاقستان رەسپۋبليكاسىنىڭ كونستيتۋسيا كۇنىنە وراي الماتى قالاسىنىڭ مەدەۋ، تۇركىسىب، بوستاندىق، الاتاۋ، المالى اۋداندارىنىڭ وكىلدەرى جانە تەاتر ۇجىمىنىڭ قاتىسۋىمەن zoom پلاتفورماسى ارقىلى «كونستيتۋسيا – ەگەمەندىكتىڭ التىن قازىعى» تاقىرىبىندا ونلاين دوڭگەلەك ۇستەل وتكىزدى. دوڭگەلەك ۇستەلدىڭ ماقساتى - ادىلدىك، بوستاندىق پەن تەڭ قۇقىقتىڭ نىشانى – قازاقستان رەسپۋبليكاسىنىڭ كونستيتۋسياسى كۇنىنىڭ ماڭىزىن ارتتىرۋ. الماتى كۇنى اياسىندا قالانىڭ گۇلدەنۋى، بولاشاعىنىڭ جارقىن دا الاڭسىز بولۋىنا جاستاردىڭ دا قوسار ۇلەسى زور ەكەندىگىن كورسەتەتىن – «الماتى – ماحاببات مەكەنى»، سان جىلدار تاريح سىنىندا سىنالىپ، اتامەكەنiنە قايتا ورالعان الما اعاشىنىڭ جەمiسi – الماتىنىڭ اپورتىنىڭ كيەسىن ناسيحاتتايتىن «الماتىنىڭ اپورتىن، ساۋلەم، ساعان سىيلايمىن» سىندى ونلاين جوبالار جۋىردا كورەرمەن نازارىنا ۇسىنىلماقشى. كاسىبي شىعارماشىلىعىن شىڭداپ، تەاتر الەمىندەگى جاڭاشىل باعىتتار مەن ەلەۋلى جاڭالىقتاردى نازاردان تىس قالدىرماي، رۋحاني جاڭارۋ مەن دامۋدى نەگىزگى جۇمىس وزەگىنە اينالدىرعان قۋىرشاق تەاترى جىل باسىنان باستاپ تاتارستان رەسپۋبليكاسى قازان قالاسىندا وتكىزىلگەن «ناۋرىز» XV حالىقارالىق تۇركى حالىقتارىنىڭ تەاتر فەستيۆالىندە «مەن ءبىر جۇمباق اداممىن... اباي» قويىلىمىن ونلاين ۇسىنىپ، ارنايى ديپلوممەن ماراپاتتالدى. رەسەي فەدەراسياسى سانكت-پەتەربۋرگ قالاسىندا ونلاين فورماتتا وتكىزىلگەن «كۋكART» XV حالىقارالىق قۋىرشاق جانە سينتەتيكالىق تەاترلار فەستيۆالىنە ساراپتاۋدان ءوتىپ، ارنايى شاقىرتۋمەن قاتىسقان «رومەو مەن دجۋلەتتا» قويىلىمى «ۋيليام شەكسپير شىعارماسىنىڭ قازاق تىلىندەگى ەرەكشە وقىلىمى» نوميناسياسىنا يە بولدى. سونىمەن قاتار، ش.ايتماتوۆتىڭ «انا – جەر انا» قويىلىمى ونلاين فورماتتا شەتەلدىك تەاتر ۇجىمدارى اراسىندا جازۋشى شىعارمالارى جەلىسىندە ساحنالانعان سپەكتاكلدەر قاتارىنان توپ جارىپ، قىرعىزستان رەسپۋبليكاسىنىڭ ۇلتتىق «ەرگۋۋ» تەاتر جۇلدەسىن يەلەنىپ، «قىرعىز اۆتورىنىڭ شىعارماسىن ەڭ ۇزدىك ساحنالاعان شەت ەلدىك تەاتر» نوميناسياسى بويىنشا جەڭىسكە جەتتى. ءونەر ۇجىمى قازان ايىندا تۇركيادا وتكىزىلەتىن VII حالىقارالىق «انكارا» قۋىرشاق تەاترلار فەستيۆالىنە ءۇش مارتە شاقىرۋ الىپ، بيىلعى جىلى ەرەسەكتەرگە ارنالعان «ماكبەت. يلليۋزيا» قويىلىمىمەن قاتىسۋدى جوسپارلاپ وتىر. سونىمەن قاتار، رەسپۋبليكامىزدا ۇيىمداستىرىلاتىن «تەART-كوكشە» حالىقارالىق تەاتر فەستيۆالىنە «كاشتانكا» قويىلىمىمەن جانە قاراعاندى قالاسىندا وتكىزىلەتىن «سىن –شىن بولسىن...» اشىربەك سىعاي اتىنداعى رەسپۋبليكالىق تەاترلار فەستيۆالىنە «رومەو مەن دجۋلەتتا» تراگەدياسىن ۇسىنۋعا دايىندىق ۇستىندە.
سىرلى الەمىمەن باۋرايتىن قاراپايىم قۋىرشاقتاردىڭ ءتۇرلى مۇمكىندىكتەرىن جان-جاقتى كورسەتەتىن جاڭاشىل فورمالار مەن باتىل قادامداردىڭ ايقىن كورىنىسىنىڭ ايعاعى – الماتى مەملەكەتتىك قۋىرشاق تەاترى. ال ونەر ورداسىنىڭ ەڭ باستى ميسسياسى – كورەرمەن قۋانىشىن ارتتىرۋ.