8 قىركۇيەك ساعات 9:00-دەگى جاعداي بويىنشا، 662850 رەسپوندەنت ونلاين ساناقتان ءوتتى. ءبىر تاۋلىك ىشىندە 209 مىڭنان اسا ادام ساناق ساۋالدارىنا جاۋاپ بەرگەن، دەپ حابارلايدى almaty-akshamy.kz ۇلتتىق ستاتيستيكا بيۋروسىنىڭ باسپا ءسوز قىزمەتىنە سىلتەمە جاساپ.
وسىلايشا تاۋلىكتىك رەكورد جاڭارىپ وتىر. 570251 ادام sanaq.gov.kz سايتىندا، 71387 Egov پورتالىندا تىركەلۋ ارقىلى جاۋاپ بەرسە، 21212 ادام ساناققا اitu قوسىمشاسى ارقىلى قاتىستى.
العاشقى جەتى كۇننىڭ قورىتىندىسىمەن الماتى العا شىقتى. مۇندا 88595 تۇرعىن ساناقتان وتكەنى جايلى حابارلاما العان. ونلاين ساناقتان وتكەن تاعى 87275 ادام نۇر-سۇلتاندا تىركەلگەن. ۇزدىك ۇشتىكتى الماتى وبلىسى تۇيىندەدى. مۇندا 62392 ادام ساناق ساۋالدارىنا جاۋاپ بەردى.
بۇل كورسەتكىش بويىنشا ازىرگە سوڭعى ەكى ورىندى تۇركىستان جانە اتىراۋ وبلىستارى ەنشىلەپ تۇر. بۇل وڭىرلەردە سايكەسىنشە 10345 جانە 6667 ادام ساناقتان ءوتىپتى.
الەۋمەتتىك جەلىلەردە «ءسىز قانشا ءتىرى بالا تۋدىڭىز؟» دەگەن ساۋال توڭىرەگىندە پىكىرتالاس وربۋدە. اتاپ وتەرلىگى، اتالعان سۇراق ەۋروپالىق ستاتيستيكالىق كونفەرەنسياسىنىڭ ۇسىنىسىمەن قوسىلعان بولاتىن. ايەلدەردىڭ ءتىرى تۋعان بالالارى جونىندەگى ساۋال سوڭعى 50 جىل ىشىندە حالىق ساناعىن وتكىزۋ كەزەندە كەڭىنەن قولدانىلىپ كەلگەن. بۇل سۇراق دەموگرافيالىق زەرتتەۋ ءۇشىن دە ۇدايى قويىلادى.
2021 جىلى ءتىرى تۋعان بالالار جونىندەگى ساۋالدار دۇنيەگە كەلگەن سابيلەردىڭ جىنىسى مەن ساناق وتكىزگەنگە دەيىنگى سوڭعى تۋعان نارەستەنىڭ تۋعان كۇنىن انىقتاۋعا ارنالعان ناقتىلاۋشى سۇراقتارمەن تولىقتى. ولارعا بەرىلگەن جاۋاپ كەيىن نارەستە ءولىمى كورسەتكىشىن بالانىڭ جىنىسىنا قاراي تەرەڭ تالداۋعا قولدانىلادى.
ءتىرى تۋعان بالالار تۋرالى ساۋال سالۋ تۋۋ كورسەتكىشى تۋرالى ماڭىزدى دەرەكتەردى الۋعا جول اشادى. كوپ جاعدايدا مۇنداي مالىمەتتى باسقا جەردەن، ءتىپتى ازاماتتىق حال اكتىلەرىن تىركەۋ جۇيەسى دامىعان بولسا دا، الۋ مۇمكىن بولمايدى. اتاپ وتەرلىگى، بۇل سۇراققا تەك قانا رەپرودۋكتيۆتى جاستاعى ايەلدەر عانا جاۋاپ بەرمەيدى. الىنعان مالىمەتتەر ءار كەزەڭدەگى تۋۋ جانە نارەستەلەر مەن بالالار ءولىمى تەندەنسياسىن سالىستىرۋ جانە باعالاۋ ءۇشىن قاجەت.
حالىق ساناعى ناتيجەسىندە جينالعان اقپارات ادەتتە حالىقتىڭ تابيعي قوزعالىسىن تىركەۋ بازاسىنداعى مالىمەتتەردەن الدەقايدا ناقتى ءارى تولىققاندى بولادى.
سونداي-اق، الىنعان ناتيجەلەر ب ا ق تاراپىنان مول سۇرانىسقا يە ەكەنىن اتاپ وتكىمىز كەلەدى. سەبەبى نارەستەلەر مەن بالالار ءولىمىنىڭ كورسەتكىشى، ونىڭ كەزەڭ-كەزەڭمەن وزگەرۋى تۋرالى مالىمەتتەرگە تۇرعىندار ۇلكەن قىزىعۋشىلىق تانىتادى.
ۇلتتىق ستاتيستيكا بيۋروسى ازاماتتاردىڭ بەلسەندىلىگى ءۇشىن العىس ايتا وتىرىپ، ساناقتى ونلاين وتۋگە شاقىرادى. sanaq.gov.kz سايتى 15 قازانعا دەيىن تاۋلىك بويى قولجەتىمدى بولماق. ونلاين ساناقتان وتپەگەندەر 1-30 قازان ارالىعىندا ينتەرۆيۋەرلەردىڭ ساۋالدارىنا جاۋاپ بەرە الادى. بارلىق ساۋالدار بويىنشا 1446 بايلانىس ورتالىعىنا حابارلاسۋعا بولادى. قوڭىراۋ شالۋ تەگىن.