2023 جىلدىڭ 12-16 جەلتوقسان ارالىعىندا الماتىدا XI حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى وتەدى.
فەستيۆال ءداستۇرلى تۇردە Tanaris Production جانە A-Team كينوكومپانيالارىمەن الماتى قالاسى اكىمدىگىنىڭ جانە ق ر مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلادى، دەپ حابارلايدى almaty-akshamy.kz.
12 جەلتوقساندا اباي اتىنداعى قازاق ۇلتتىق وپەرا جانە بالەت تەاترىندا فەستيۆال سالتاناتتى تۇردە رەجيسسەر ەلدار قاپاروۆتىڭ «سوعىس تۇتقىنى» تاريحي دراماسىنىڭ پرەمەراسىمەن اشىلادى.
فيلمدەگى وقيعانىڭ نەگىزى ەكىنشى دۇنيەجۇزىلىك سوعىستان كەيىن كەڭەستىك تۇتقىندا بولعان جاپوندىق جاس جىگىت، يمپەراتورلىق مەكتەپتىڭ كۋرسانتى احيكو تەسۋرونىڭ شىنايى تاريحى مەن تاعدىرى. لاگەردە جاس جاپوندىق سوعىستىڭ ناعىز باتىرى، كەڭەس ارمياسىندا قىزمەت ەتكەن جانە بەرلينگە شابۋىل جاساۋعا قاتىسقان قازاق جاۋىنگەرى اقاجان كەزدەسەدى. ول كەيىن جاپون سوعىسىنا جىبەرىلىپ، وندا جاراقات الىپ، تۇتقىنعا تۇسكەن. قايتىپ ورالعاننان كەيىن اقاجان "ساتقىن جانە حالىق جاۋى" رەتىندە سوتتالعان…
ءفيلمدى پروديۋسەرلەر بوريس چەردابايەۆ جانە ءاليا ۋۆالجانوۆا باستاعان حالىقارالىق كوماندا تۇسرىگەن. جاپوندار جاقتان سانو سيندزيۋ جانە شۋيچي ەسيمۋرا بولدى. باستى كەيىپكەرلەردىڭ رولدەرىن سىرىم قاشقابايەۆ (قازاقستان) جانە ەيساكۋ وگاساۆارا (جاپونيا) سومدادى.
فەستيۆالگە قاتىسۋ ءۇشىن يسپانيا، فرانسيا، رۋمىنيا، پولشا، يوردانيا، ءۇندىستان، گرۋزيا، وزبەكستان، قىرعىزستان جانە باسقا دا ەلدەردەن 700-دەن استام ءوتىنىم كەلىپ ءتۇستى.
بيىلعى جىلى Bastau DEBUTS دەبيۋتتىك تولىقمەتراجدى كوركەم فيلمدەرىنىڭ حالىقارالىق بايقاۋى ەرەكشە قىزىعۋشىلىق تۋدىرادى، وعان بۇكىل الەم بويىنشا "ا" كلاسىنداعى ءىرى كينوفەستيۆالدەرگە قاتىسقان 10 كارتينا كىردى. مۇندا بەرلين كينوفەستيۆالىندە جۇلدەلى بولعان يسپاندىق «20 تىسياچ پورود ءپچول» كارتيناسى جانە 2023 جىلعى كانن فەستيۆالىنىڭ قاتىسۋشىلارى - «ەسلي بى تولكو يا موگ ۆپاست ۆ سپياچكۋ» (موڭعوليا، فرانسيا، شۆەيساريا، كاتار) جانە "ينشاللاح مالچيك" (يوردانيا، كاتار، ساۋد ارابياسى، فرانسيا) فيلمدەرى بار. سونىمەن بىرگە الەمدىك پرەمەراسى بەرلينالەدە وتكەن رەسەيلىك «كلەتكا يششەت پتيسۋ» ءفيلمى، وزبەكستاننان رەجيسسەر شوكير حوليكوۆتىڭ كوپتەگەن حالىقارالىق كينوفەستيۆالدەردىڭ جەڭىمپازى اتانعان «جەكسەنبى» كينوسى دا قاتىسادى. ال قازاقستان اتىنان بىردەن ەكى تۋىندى – ماكسيم اكباروۆتىڭ «ستەپ» جانە داۋلەتجان ماحمۇتتىڭ "گلوبۋس" اتتى فيلمدەرى سىنعا تۇسەدى.
بارلىق كورسەتىلىمدەر «ارمان» كينوورتالىعىندا وتەدى. كىرۋ تەگىن.
كونكۋرستان تىس باعدارلامالار دا قىزىقتارعا تولى. فەستيۆال كەزىندە قىسقامەتراجدى كوركەم جانە دەرەكتى فيلم جوبالارى رەجيسسەرلەرىنە ارنالعان Almaty Film Lab شەبەرحاناسى وتەدى. وندا جەڭىمپازداردى اقشالاي سىيلىقتار كۇتەدى (بارلىعى 7 ملن تەڭگە).
فەستيۆال قوناقتارىنىڭ ءبىرى – ايگىلى بريتاندىق پروديۋسەر پول برەتت بولماق. ول 30-دان استام ءتۇرلى جانرداعى تولىقمەتراجدى فيلمدەردىڭ وندىرىسىنە قاتىسقان. ولاردىڭ ىشىندەگى ەڭ تانىمالى – رەجيسسەر توم حۋپەردىڭ «وسكار» سىيلىعىن جەڭىپ العان «كورول گوۆوريت!» كارتيناسى، وندا پول اتقارۋشى پروديۋسەر بولىپ جۇمىس ىستەگەن. پول فەستيۆال اياسىندا «ءفيلمىڭىزدى الەمگە قالاي تانىتۋعا بولادى» تاقىرىبىندا شەبەرلىك ساباعىن وتكىزەدى.
سونىمەن قاتار فەستيۆال اياسىندا ايگىلى امەريكاندىق سەناريست، پروديۋسەر جانە جازۋشى دجەيمس ۆ. حارتتىڭ سەناريي شەبەرلىگى بويىنشا ونلاين شەبەرلىك ساباعى وتەدى. ءوزىنىڭ ۇزاق مانسابىندا 76 جاسقا كەلگەن دجەيمس ستيۆەن سپيلبەرگتىڭ «كاپيتان كريۋك» (1991)، فرەنسيسا فوردا كوپپولانىڭ «دراكۋلا» (1992)، روبەرت زەمەكيستىڭ «كونتاكت» (1997)، يان دە بونتتىڭ «لارا كروفت: راسحيتيتەلنيسا گروبنيس 2 — كولىبەل جيزني» (2003)، برەك ەيسنەردىڭ «ساحارا» (2005)، كەرستەن شەريداننىڭ «اۆگۋست راش» (2007) جانە تاعى باسقا بەلگىلى فيلمدەردىڭ سەنارييلەرىن جازعان.
سونداي-اق، بيىل فەستيۆالدى العاش رەت فرانسيانىڭ قازاقستانداعى ەلشىلىگى قولداپ وتىر. وسى ىنتىماقتاستىق شەڭبەرىندە la CinéFabrique كينومەكتەبىنىڭ جانە DOCMONDE قاۋىمداستىعىنىڭ ءبىرقاتار شەبەرلىك سىنىپتارى مەن تۇساۋكەسەرلەرى، RUBIKA انيماسيالىق مەكتەبى (فرانسيا) مەن ت. جۇرگەنوۆ اتىنداعى قازاق ۇلتتىق ونەر اكادەمياسى جانە «قازانيماسيا» اراسىندا مەموراندۋمعا قول قويىلادى.