حابارلاما جاساۋ ءتارتىبى قاراستىرىلعان
ق ر باس پروكۋرورىنىڭ اعا كومەكشىسى ازامات سارعازين رەسپۋبليكالىق رەفەرەندۋم اياسىندا ميتينگ وتكىزۋدىڭ ءتارتىبىن ءتۇسىندىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«رەفەرەندۋم الدىندا ۇگىت جۇرگىزۋ ماقساتىمەن جينالىستار مەن ميتينگىلەر وتكىزۋ ءتارتىبى 2020 جىلعى 25 مامىردا قابىلدانعان «بەيبىت جينالىستاردى وتكىزۋ جانە ۇيىمداستىرۋ ءتارتىبى تۋرالى» زاڭمەن رەتتەلەدى. سايكەسىنشە، ازاماتتار مەن قوعامدىق بىرلەستىكتەردىڭ وسى سيپاتتاعى جينالىستار مەن ميتينگىلەر وتكىزۋ نيەتى بولسا، حابارلاما جاساۋ ءتارتىبى قاراستىرىلعان. ولاردى وتكىزۋ تۋرالى حابارلاما اكىمدىككە بەلگىلەنگەن كۇنگە 5 جۇمىس كۇنى قالعانعا دەيىن كەشىكتىرىلمەي جازباشا بەرىلۋى ءتيىس. ونداي بەيبىت جينالىستىڭ ماقساتى مەن نىسانى، ۇيىمداستىرۋشىلار مەن قوعامدىق ءتارتىپتى ساقتاۋعا جاۋاپتى ادامداردىڭ دەرەكتەرى كورسەتىلەدى. اكىمدىك حابارلامانى تىركەگەن كۇننەن باستاپ 3 جۇمىس كۇنى ىشىندە قاراۋعا ءتيىس. وسى 3 كۇن وتكەننەن كەيىن اكىمدىك تاراپىنان جاۋاپ بولماعان جاعدايدا ۇيىمداستىرۋشى بەرىلگەن حابارلاما بويىنشا جينالىس وتكىزۋگە قۇقىلى»، - دەدى باس پروكۋروردىڭ اعا كومەكشىسى.
سونداي-اق، ول اتالعان حابارلامانى قاراۋ نەمەسە جەرگىلىكتى اتقارۋشى ورگاننىڭ شەشىمىن الۋ مەرزىمدەرى وتكەننەن كەيىن عانا وسىنداي ءىس شارالارعا قاتىسۋعا ۇگىتتەۋگە بولاتىنىن ەسكە سالدى. باس پروكۋراتۋرا وكىلى رەفەرەندۋم كەزىندە بەيبىت جيىندار وتكىزۋدىڭ تالابىن بۇزعاندارعا قانداي جازا قولدانىلاتىنىنا توقتالدى.
«ەگەر وسى تالاپتار ساقتالماي، جينالىس نەمەسە ميتينگىلەر جەرگىلىكتى اكىمدىككە ءتيىستى حابارلاما بەرىلمەستەن ۇيىمداستىرىلىپ، وتكىزىلسە، ۇيىمداستىرۋشىلار دا، قاتىسۋشىلار دا اكىمشىلىك جاۋاپقا تارتىلۋى مۇمكىن. مۇنداي ارەكەتتەر ءۇشىن اكىمشىلىك قۇقىق بۇزۋ تۋرالى كودەكستىڭ 488-بابى بويىنشا، ەسكەرتۋ، ايىپپۇل جانە قاماۋ تۇرىندە جازا كوزدەلگەن. جەرگىلىكتى اتقارۋشى ورگان جينالىستى نەمەسە ميتينگىنى وتكىزۋدى كەلىسۋدەن رەسمي تۇردە باس تارتقان جاعدايدا دا ولاردى وتكىزۋگە تىيىم سالىنادى جانە اكىمشىلىك جاۋاپتىلىققا اكەپ سوقتىرادى. ەگەر بۇل ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتەردىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرۋمەن قاتار جۇرسە، قىلمىستىق كودەكستىڭ 400-بابى بويىنشا قىلمىستىق جاۋاپتىلىق تۋىندايدى. ول 200 اەك-كە دەيىنگى مولشەردە ايىپپۇل نەمەسە 200 ساعاتقا قوعامدىق جۇمىستارعا تارتۋ، نە 50 تاۋلىككە دەيىنگى مەرزىمگە قاماۋ تۇرىندە جازانى كوزدەيدى»، - دەدى ازامات سارعازين.