ورتالىق قالالىق كلينيكالىق اۋرۋحانا دارىگەرلەرى تۇڭعىش رەت سال اۋرۋىنا بىرەگەي وتا جاسادى.
سەلەكتيۆتى ريزوتوميا دەپ اتالاتىن وتا 18 جاستاعى جىگىتكە مىندەتتى الەۋمەتتىك مەديسينالىق ساقتاندىرۋ ەسەبىنەن جاسالدى، دەپ حابارلايدى Almaty-akshamy.kz Baq.kz-كە سىلتەمە جاساپ.
وقكا باسپا ءسوز قىزمەتىنىڭ مالىمەتىنشە، وپەراسيانى ورتالىق كلينيكالىق اۋرۋحانا نەيروحيرۋرگى مارات الماتوۆ، №2 قالالىق بالالار اۋرۋحاناسى نەيروحيرۋرگى ازامات جايىلعانوۆ پەن نيەۆرولوگ-نەيروفيزيولوگ گۇلنۇر قاسەنوۆا باستاعان بىلىكتى ماماندار جاسادى.
دارىگەرلەردىڭ ايتۋىنشا، مۇنداي وتا بالالىق شاقتا جاسالۋى قاجەت. بۇل سال اۋرۋىمەن اۋىراتىن پاسيەنتتىڭ قيمىل-قوزعالىسىن جەڭىلدەتىپ، ءجۇرىسىن قالىپقا كەلتىرەر ەدى. الايدا پاسيەنت ماماندار كومەگىنە 18 جاسقا تولعاننان كەيىن عانا جۇگىنگەن.
سەلەكتيۆتى دورسالدى ريزوتوميا – سەرەبرالدى سال اۋرۋىمەن تۋىلعان ناۋقاستاردىڭ قۇرىسقان بۇلشىق ەتىن جۇمسارتىپ، قيمىل-قوزعالىستى رەتتەۋگە ارنالعان وپەراسيا. وتا بارىسىندا دارىگەر جۇلىننىڭ تومەنگى بولىگىندەگى سەنسورلىق قابىقشالاردى ءىشىنارا الىپ تاستايدى. بۇل اياق-قولدىڭ قۇرىسۋىن ازايتىپ، ناۋقاستىڭ جاعدايىن ەداۋىر جاقسارتۋعا مۇمكىندىك بەرەدى.
«نەيروحيرۋرگتەن زەرگەرگە ءتان شەبەرلىكتى قاجەت ەتەتىن كۇردەلى وپەراسيا 6 ساعاتقا سوزىلدى. وتا بارىسىندا ءبىز ميكروسكوپ ارقىلى نەيرومونيتورينگ جاساپ وتىردىق ناتيجەسىندە بەلگىلى ءبىر بۇلشىق ەتتەردىڭ جۇمىسىنا جاۋاپ بەرەتىن جۇيكە جۇيەلەرىندە اقاۋ بارى انىقتالدى. بىلايشا ايتقاندا، بۇلشىق ەتتەردى قۇرساپ، پاسيەنتتىڭ ءجۇرىپ-تۇرۋىن قيىنداتقان جۇيكە تالشىقتارى الىنىپ تاستالدى»، – دەيدى وقكا نەيروحيرۋرگيا ءبولىمىنىڭ مەڭگەرۋشىسى مارات الماتوۆ.
وسى جاسقا دەيىن قيمىل-قوزعالىس شەكتەلۋىنەن زارداپ شەگىپ كەلگەن جاس جىگىت ءقازىر ءوز بەتىنشە ءجۇرىپ-تۇرادى. بۇگىندە اۋرۋحانادان شىعۋعا دايىندالىپ جاتىر. كەيىن پاسيەنت رەابيليتاسيادان ءوتۋى ءتيىس. وپەراسيا ءساتتى وتكەنىمەن ونىڭ ناتيجەسىن كۇشەيتۋ ءۇشىن ۇزاق ۋاقىت مەديسينالىق وڭالتۋدان ءوتۋ قاجەت.
ەسكە سالا كەتسەك، مەديسينالىق ساقتاندىرۋ ەنگىزىلگەننەن كەيىن الماتى قالاسى دەنساۋلىق ساقتاۋ سالاسىنىڭ بيۋدجەتى ەداۋىر ارتتى. 2022 جىلى سالاعا 243،5 ملرد تەڭگە قاراستىرىلعان، بۇل بىلتىرعى بيۋدجەتتەن 17،3 پروسەنت ارتىق. ونىڭ 136،4 ملرد تەڭگەسى – تەگىن مەديسينالىق كومەك پاكەتىنە، 107،1 ملرد تەڭگەسى – ءمامس پاكەتىنە تيەسىلى. ماسەلەن، وتكەن جارتى جىلدا جوعارى تەحنولوگيالاردىڭ كومەگىمەن جاسالاتىن وپەراسيالاردى قارجىلاندىرۋ دەڭگەيى 5،4 ملرد تەڭگەگە ارتتى. ياعني، 2021 جىلدىڭ ءبىرىنشى جارتىسىندا اتالعان وپەراسيالارعا 16،2 ملرد تەڭگە جۇمسالعان بولسا، بيىل 21،6 ملرد تەڭگە بولىنگەن.