2022 جىلى ىزدەۋدە جۇرگەن ادامداردى ۇستاپ بەرۋ تۋرالى 50 سۇراۋ سالۋ شەت مەملەكەتتەر تاراپىنان قاناعاتتاندىرىلدى.
بۇل تۋرالى ق ر باس پروكۋراتۋراسىنان ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
مىسالى، وتكەن جىلى باحرەين كورولدىگىنەن كامەلەتكە تولماعاندار ساۋداسىنا، اتاپ ايتقاندا، قىزداردى قازاقستاننان باحرەينگە جىنىستىق پايدالانۋعا جىبەرگەنى ءۇشىن كۇدىكتى ا.پيچۋگينا ۇستالىپ، ەلىمىزگە بەرىلدى.
سول سياقتى «ربك بانكى» اق-نىڭ 15 ملن اقش دوللارىنان استام قاراجاتىن ۇرلادى دەگەن كۇدىكتى ۆ.ۆلاسوۆ، قارجى پيراميداسىن («Qi TRADE Kazakhstan»، «ۆىگودنىە زايمى») قۇرعانى جانە باسشىلىق ەتكەنى ءۇشىن ىزدەۋدە جۇرگەن س.ابسامەتوۆا، ب.تومين جانە ە.شاريفۋللين، 1 ملرد تەڭگەدەن استام سوماعا باعالانعان التىنى بار ماتەريالدى ۇرلاعان قىلمىستىق توپتىڭ قۇرامىندا بولعان ا.تيماكوۆ رەسەي تاراپىنان ۇستاپ بەرىلگەن.
«ترانسۇلتتىق ۇيىمداسقان توپتىڭ قۇرامىندا اسا ءىرى مولشەردە التىن مەن زەرگەرلىك بۇيىمداردىڭ ەكونوميكالىق كونترابانداسى ءۇشىن ىزدەۋدە جۇرگەن تاستان ەبۋبەكيردى ۇستاپ بەرۋ تۋرالى سۇرانىس قىرعىزستان تاراپىنان قاناعاتتاندىرىلدى. اتىس قارۋىن قولدانۋ ارقىلى اۋىرلاتاتىن ءمان-جايدا كىسى ولتىرگەنى ءۇشىن ىزدەۋدە جۇرگەن و.يسسالى مەن ب.يسابەكوۆ تاجىكستاننان ەكستراديسيالاندى. الاياقتىق جولىمەن 288 ملن تەڭگەنى ۇرلاعانى ءۇشىن قازاقستاننىڭ قۇقىق قورعاۋ ورگاندارى ىزدەپ جۇرگەن ا.سمالبايەۆانى وزبەكستان تاراپى ۇستاپ بەردى»، - دەپ اتاپ ءوتتى باس پروكۋراتۋرادان.
ايتا كەتسەك، مەملەكەت باسشىسىنىڭ تاپسىرماسى نەگىزىندە شەتەلدەن زاڭسىز شىعارىلعان اكتيۆتەردى قايتارۋ بويىنشا كەشەندى جۇمىس جۇرگىزىلىپ جاتىر. ۇكىمەت جانە باسقا دا مۇددەلى مەملەكەتتىك ورگاندارمەن بىرلەسىپ، زاڭسىز شىعارىلعان اكتيۆتەردى قايتارۋ جونىندەگى قوسىمشا ءىس-شارالار كەشەنىن قامتيتىن زاڭ جوباسى ازىرلەنۋدە.