باس ءمۇفتيدىڭ توراعالىعىمەن قازاقستان مۇسىلماندارى ءدىني باسقارماسىنىڭ وكىلدەرى باس قوستى

قاسيەتتى رامازان ايىنىڭ باستالۋىنا ساناۋلى كۇندەر قالدى

باس ءمۇفتي ناۋرىزباي قاجى تاعان ۇلىنىڭ توراعالىعىمەن قازاقستان مۇسىلماندارى ءدىني باسقارماسىنىڭ ءتورالقا ءماجىلىسى ءوتتى، دەپ حابارلايدى Almaty-akshamy.kz Elorda.info-عا سىلتەمە جاساپ. 

«ساناۋلى كۇندەردەن سوڭ قاسيەتتى رامازان ايى باستالادى. مۇسىلمان ۇمبەتى ءۇشىن رامازان – ەرەكشە اي. مەيىرىم مەن كەشىرىمگە، ساۋاپقا تولى ايدى ادەتتەگىدەي ءوز دەڭگەيىندە وتكىزۋدى اللا ءناسىپ ەتسىن! وسى ايدا مەيلىنشە قايىرىمدىلىق ءىس-شارالاردى كوبىرەك اتقارۋعا شاقىرامىن»، - دەدى جيىندى اشقان قمدب ءتوراعاسى.

ءتورالقا ماجىلىسىندە نايب ءمۇفتي، شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربان ۇلى بيىل قاسيەتتى رامازان ايى 2 ساۋىردەن باستالاتىنىن، وزبەكستان، قىرعىزستان مۇسىلماندارى ءدىني باسقارماسىمەن كەڭەسىپ، وسىنداي ورتاق شەشىم قابىلدانعانىن اتاپ ءوتتى.

ماجىلىستە «زەكەت جانە قايىرىمدىلىق» قورىنىڭ ديرەكتورى قانات قىدىرمين قاسيەتتى ايدا اتقارىلاتىن قايىرىمدىلىق ءىس-شارالار تۋرالى باس مۇفتيگە باياندادى.

ايتا كەتسەك، بيىل رامازان ايى 2 ساۋىردە باستالىپ، 1 مامىردا اياقتالادى. ورازا 30 كۇن بولماق. 2 مامىر – ورازا ايت كۇنى. 27 ساۋىردەن 28 ساۋىرگە قاراعان ءتۇن – ءقادىر ءتۇنى.