باس جوسپاردىڭ ماڭىزدى بولىگى – ەكولوگيالىق قۇرىلىمدى كەڭەيتۋ

بۇگىنگى تاڭدا جاسىل جەلەكتەردىڭ جالپى اۋدانى 1،3 مىڭ گا قۇرايدى.

اعىمداعى جاعداي الماتىدا جاسىل ايماقتار قالانىڭ بارلىق اۋداندارىندا دامىماعانىن كورسەتەدى، دەپ حابارلايدى Almaty-akshamy.kz

باس جوسپاردا الماتىنىڭ جاسىل جەلەەك قورىن كەڭەيتۋ ماقساتى ايقىندالعان. ول ءۇشىن كەلەسى جىلدىڭ سوڭىنا دەيىن 8 جاڭا ساياباق قۇرىلىپ، قولدانىستاعى 13 ساياباق اباتتاندىرىلادى.

بيىلعى جىلى 340 مىڭ اعاش وتىرعىزۋ، 17 مىڭ اپاتتى جانە قۋراعان اعاشتاردى بۇزۋ، 2،8 ملن. اعاشتى بيووڭدەۋ، اۋدانى 30 گا بولاتىن ەكى پيتومنيك قۇرۋ جوسپارلانعان.

بۇل شارالار كوشەتتەردىڭ ءومىر ءسۇرۋ دەڭگەيىن 90%-عا دەيىن (2022 ج. - 70%) جانە جاسىل ەكپەلەردىڭ اۋماعىن 12،6 ش.م/ادامعا دەيىن ارتتىرۋعا مۇمكىندىك بەرەدى.

مەملەكەت باسشىسىنىڭ 3،3 ملن اعاش وتىرعىزۋ جونىندەگى تاپسىرماسىن ورىنداۋ شەڭبەرىندە 2025 جىلعا قاراي – 1،2 ملن اعاش، 2030 جىلعا قاراي – 1،3 ملن اعاش، ال 2040 جىلعا قاراي – 3،3 ملن اعاش وتىرعىزىلاتىن بولادى.

سونداي-اق، كوگالداندىرۋ اۋماقتارىن كەڭەيتۋ ارقىلى جاڭا جاسىل ايماقتار قۇرۋ جوسپارلانۋدا. 2030 جىلعا قاراي كوگالداندىرىلعان اۋماقتاردىڭ جالپى اۋدانى 3340 گەكتارعا، ال 2040 جىلعا قاراي 3840 گەكتارعا جەتۋى كەرەك.

2025 جىلعا دەيىن 1200 ديزەلدى اۆتوبۋستاردى گازعا جانە ەلەكتر تارتقىشقا اۋىستىرۋ جوسپارلانۋدا، 2 جاڭا گاز اۆتوپاركى، 5 جاڭا گاز قۇيۋ ستانسياسى پايدالانۋعا بەرىلىپ، 200 بىرلىك كولەمىندە تروللەيبۋس پاركى جاڭارتىلادى.

2025-2030 جىلدار كەزەڭىندە جەكە جانە قوعامدىق ەلەكتر كولىگى ءۇشىن زاريادتاۋ ينفراقۇرىلىمى جەلىلەرى قۇرىلاتىن بولادى.

سونداي-اق، 2-جەو-نى كەزەڭ-كەزەڭىمەن گازداندىرۋ اتموسفەراعا شىعارىندىلاردى جىلىنا 2،5 مىڭ تونناعا دەيىن تومەندەتۋگە مۇمكىندىك بەرەدى (جىلىنا 33،5 مىڭ تونناعا تومەندەۋ).

قابىلدانعان شارالار قالانىڭ ەكولوگيالىق احۋالىن جانە قالا تۇرعىندارىنىڭ جايلىلىعىن جاقسارتۋعا مۇمكىندىك بەرەدى.