ورتالىق ازيادا ازىرگە مۇنداي باعدارلامانىڭ بالاماسى جوق
«ەتنوساياساتتانۋ» ماگيسترلەرى ەلوردادا دايىندالادى. ەكى جىلدىق ءبىلىم بەرۋ باعدارلاماسى كاسىبي ستاندارتتارعا سايكەس جاسالعان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ەتنوساياسات سالاسىنداعى ساراپشىلاردى دايارلاۋ – مەملەكەتتىك دەڭگەيدەگى قاجەتتىلىك. بۇل تۋرالى ل.ن.گۋميليەۆ اتىنداعى ەۇۋ قازاقستان حالقى اسسامبلەياسى كافەدراسىنىڭ مەڭگەرۋشىسى ناتاليا كالاشنيكوۆا ءمالىم ەتتى. ونىڭ ايتۋىنشا، ەتنوساياساتتانۋ ماماندىعىندا ءبىلىم الىپ جاتقان ماگيسترلەر بولاشاقتا كوپتەگەن ساياسي ماسەلەلەرگە ساراپشى بولا الادى. سەبەبى بۇل – جان-جاقتى ماماندىق.
ايتا كەتەيىك، جاڭا ءبىلىم بەرۋ باعدارلاماسى جۋرناليستيكا، ساياساتتانۋ جانە حالىقارالىق قاتىناستار فاكۋلتەتتەرىنىڭ ءعىلىمي-بىلىم بەرۋ بازاسىندا ىسكە اسىرىلدى. قازىرگى تاڭدا ەتنوساياساتتانۋ ماماندىعىندا 10 ماگيستر ءبىلىم الۋدا.
«ارنايى مامانداندىرىلعان فاكۋلتەتتى اشاتىن كەزدە ۇلكەن تالقىلاۋ بولدى. بۇل ماسەلەدە بىزگە ەتنومادەني بىرلەستىك ءوز قولداۋىن كورسەتتى. ايماقتىق ەتنومادەني بىرلەستىكتەر دە اتسالىسىپ، ەلىمىزدە ەتنوساياساتتانۋشىلارعا سۇرانىس بارىن راستادى. ءبىز اپروباسيالانعان دۋبلين ستاندارتتارى باعدارلامالارىنان وتتىك. سوندىقتان دا ءقازىر ساياساتتانۋ ءبىلىم بەرۋ باعدارلامالار توبىندا ەكى جىلدىق ماگيسترلىك عىلىمي-پەداگوگيكالىق باعىت جۇزەگە اسىرىلىپ جاتىر. بولاشاقتا ءبىلىم الىپ شىققان ماماندار ءتۇرلى سالادا جۇمىس ىستەي الاتىن، جاۋاپتى ساراپشىلار بولىپ شىعاتىنىنا سەنىمدىمىن»، - دەيدى ل.ن.گۋميليەۆ اتىنداعى ەۇۋ-نىڭ قازاقستان حالقى اسسامبلەياسى كافەدراسىنىڭ مەڭگەرۋشىسى ناتاليا كالاشنيكوۆا.