مەملەكەت باسشىسىنىڭ قىركۇيەك ايىنداعى جولداۋىندا «ەلىمىزدىڭ باستى قۇندىلىعى – ادام. بۇل – ايقىن نارسە. سوندىقتان ۇلتتىق بايلىقتى تەڭ ءبولۋ جانە بارشاعا بىردەي مۇمكىندىك بەرۋ – رەفورمانىڭ باستى ماقساتى» دەگەن بولاتىن. ياعني پرەزيدەنتىمىز حالىق الەۋەتىن كوتەرۋگە باسا نازار اۋدارىپ وتىر. وسى ورايدا، ەلىمىزدەگى كەدەيشىلىك دەڭگەيى 20 جىلدا 9 ەسە تومەندەگەنىن ايتا كەتكەن ءجون.
ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە، حالىقتى الەۋمەتتىك قولداۋ جونىندەگى بەلسەندى شارالاردىڭ ارقاسىندا 2001–2021 جىلدار كەزەڭىندە قازاقستاندا كەدەيلىك دەڭگەيى، ياعني تابىسى ەڭ تومەنگى كۇنكورىس دەڭگەيىنەن تومەن حالىقتىڭ ۇلەسى 46،7%-دان 5،2%-عا دەيىن تومەندەگەن.
الەۋمەتتىك ساياساتتىڭ نەگىزگى مىندەتى جانە ونىڭ تيىمدىلىگىنىڭ باستى ولشەمى – قازاقستان حالقىنىڭ ءال-اۋقاتىن ۇدايى ارتتىرۋ. ەلدەگى كەدەيلىك دەڭگەيىنىڭ سەرپىندى ءتومەندەۋ ءۇردىسى 2000–2005 جىلدار كەزەڭىندە قولدانىستا بولعان رەسپۋبليكالىق باعدارلامالاردى ىسكە اسىرۋدىڭ ناتيجەسى بولدى. بۇل ۇدەرىستە 2002 جىلى كۇشىنە ەنگەن «مەملەكەتتىك اتاۋلى الەۋمەتتىك كومەك تۋرالى» زاڭنىڭ قابىلدانۋى ەرەكشە ءرول اتقاردى. بۇل قۇجاتتا قانداي دا ءبىر وبەكتيۆتى سەبەپتەرگە (جاسىنا، ۋاقىتشا ەڭبەككە جارامسىزدىعىنا، دەنساۋلىق جاعدايىنا، جۇمىستىڭ بولماۋىنا جانە ت.ب.) بايلانىستى ءوز تىنىس-تىرشىلىگى ءۇشىن جاعدايلاردى قامتاماسىز ەتۋدە قيىندىق كورىپ وتىرعان تابىسى از ازاماتتارعا اتاۋلى الەۋمەتتىك كومەك (بۇدان ءارى – ااك) كورسەتۋ كوزدەلدى.
ەلدىڭ يندۋستريالىق دامۋدىڭ جاڭا كەزەڭىنە ءوتۋى جاعدايىندا قولدانىستاعى ەڭ تومەنگى الەۋمەتتىك ستاندارتتاردى قايتا قاراۋ، ااك كۇشەيتۋ، ەنجار كومەكتەن ومىرلىك قيىن جاعدايدى ەڭسەرۋ ءۇشىن وتباسىلاردىڭ ەڭبەك بەلسەندىلىگى مەن كۇش-جىگەرىن ىنتالاندىراتىن بەلسەندى ساياساتقا كوشۋ قاجەتتىلىگى قالىپتاستى. وسىعان بايلانىستى 2020 جىلدان باستاپ اتاۋلى الەۋمەتتىك كومەك كورسەءتۋدىڭ قولدانىستاعى جۇيەسى تۇزەتىلدى. نەگىزگى باعدار ەڭبەككە ىنتالاندىرۋ، تابىسى از ازاماتتاردىڭ تابىستارى مەن مەملەكەتتىك قولداۋ مولشەرلەرىن ەسەپكە الۋعا قاتىستى اشىقتىق پەن ادىلدىكتى قامتاماسىز ەتۋ بولدى.
مينيسترلىك مالىمەتىنشە، بۇگىنگى كۇنى بەلگىلەنگەن الەۋمەتتىك كومەك قوعامنىڭ وسال توپتارىنا ۋاقىتىلى بەرىلۋدە. 2022 جىلدىڭ 1 قازانىنا الەۋمەتتىك توپتاما الۋشىلار سانى 343 مىڭ بالانى قۇرادى، ونىڭ ىشىندە ازىق-تۇلىك پاكەتىن 1 جاستان 6 جاسقا دەيىنگى 178،4 مىڭ بالا، «جاپپاي وقىتۋ» قورى شەڭبەرىندە 7 جاستان 18 جاسقا دەيىنگى 164،6 مىڭ بالا كومەك الدى. جالپى رەسپۋبليكا بويىنشا 2022 جىلعى 1 قازانداعى جاعداي بويىنشا 43 ملرد تەڭگە تولەندى.
دەگەنمەن، مەملەكەت باسشىسى وتكەن جولداۋىندا الەۋمەتتىك قامسىزداندىرۋ ءجۇيەسىنە وزگەرىس ەنگىزۋ كەرەكتىگىن دە ايتتى: «ءبىز 2023 جىلعى 1 قاڭتاردان باستاپ بالا كۇتىمى ءۇشىن تولەماقى تولەۋ مەرزىمىن ءسابي ءبىر جارىم جاسقا تولعانعا دەيىن ۇزارتامىز. بالالاردىڭ ەڭ ماڭىزدى شاعىندا – ءسابي كەزىندە اتا-انالارى جانىندا كوبىرەك بولادى».
پرەزيدەنتىمىز بەلگىلەگەن باعىتتى نازارعا الا وتىرىپ، بيلىك تاراپى ەڭبەككە ىنتالاندىرۋعا جانە تابىسى تومەن وتباسىلاردىڭ ومىرلىك قيىن جاعدايدى ەڭسەرۋىنە ءتيىستى دەڭگەيدە كومەك كورسەتەدى، الەۋمەتتىك تولەمدەردىڭ اشىقتىعىن جانە ادىلدىگىن قامتاماسىز ەتۋگە مۇمكىندىك بەرەدى دەپ سەنەمىز.