«قاراشانىڭ ۇلىسا جەلى گۋلەپ، تۇسىنە بەر قاڭتاردىڭ جەلىگى دەپ...». وسىلايشا مۇقاعالي ماقاتايەۆ جىرىنا ارقاۋ بولعان جاماۋ-جاسقاۋ ايى قاراشا بوي كورسەتتى
اقىن ايتسا ايتقانداي، وسى مەزگىلدە اۋانىڭ تەمپەراتۋراسى كۇرت تومەندەيدى. كۇندىز كۇننىڭ كوزى بىردە كورىنسە، بىردە بۇلت تۇمشالاپ كورىنبەي تۇرادى. كۇننىڭ كوزى كورىنگەنىمەن دە جىلۋى بولمايدى. تاۋ شاتقالدارىنداعى شاعىن وزەن-كولدەردە سۋ قاتۋى مۇمكىن. ەرتەڭگىلىك بوز قىراۋ تۇسەدى.
«كىشى قاراشا» امالى ءوتىپ جاتىر. بىرەر كۇندە جاڭا اي تۋادى. امال وزگەرەدى. ول – «بوزقىراۋ» دەپ اتالادى. «بوزقىراۋ» – قىستىڭ العاشقى جارشىسى. جالپى، قازەكەڭ قازان ايىنىڭ ءبىر اتاۋىن بوزقىراۋ دەگەن. ونىڭ ءمانىسى وسى ايدىڭ ىشىندە سۋىق شاقىراتىن، داۋىل، جەل اكەلەتىن بىرنەشە امال بار. سولاردىڭ اسەرىنەن كۇن سالقىنداپ، ەرتەڭگىلىك تال-شىبىققا، شوپكە بوز قىراۋ تۇرادى. بۇل سۋىقتا كوكتى ۇسىك شالىپ، سۋ بەتىنە قايماق مۇز تۇرادى.
وسى ايدىڭ ونىنان باستالاتىن «بوزقىراۋ» (بوقىراۋ) ناعىز قىراۋدىڭ ءوزى، سۋىقتىڭ كوزى. قاراشانىڭ 10 جاڭاسىنان 15 جاڭاسىنا دەيىن جالعاسادى.
امال كەزىندەگى ەرەكشەلىك: جىلقىشىلار جىلقىنى كۇنگەيگە جايادى. بۇل كەزدە بيەنىڭ ىشىندەگى قۇلىن كولدەنەڭ جاتپاعاندىقتان ءارى جىلقى تۇندە دە جايىلاتىندىقتان، قىراۋ تۇسكەن ءشوپتى جەپ قويادى. ويتكەنى، جىلقى بىردەن-بىر كۇيىس قايتارمايتىن جانۋار. ال قىراۋ جەگەن بيە ىشىندەگى قۇلىنىن تاستايتىنى تاجىريبەدە دالەلدەنگەن.
امالدىڭ اتاۋىنا كەلەر بولساق، ءارتۇرلى نۇسقاسى بار. كەيبىرەۋ بۇل بوققا (تەزەك-جاپاعا) تۇرعان قىراۋدى مەڭزەۋدەن تۋعان دەسە، ەندى ءبىرى دالانى جاۋىپ قالعان اق (بوز) قىراۋعا قاراتىلىپ ايتىلعانىن ايتادى. قالاي بولعاندا دا، اتالمىش امال كۇننىڭ سالقىنداپ، قىستىڭ جاقىنداعانىن اڭعارتسا كەرەك. «بوزقىراۋدىڭ» باستى بەلگىسى – كۇزەۋلىكتە تاڭەرتەڭ تۇرعاندا ىلعال جەرلەرگە جاپپاي قىراۋ تۇرادى.
قازەكەڭنىڭ وسى امالعا قاتىستى شىعارعان ماقال-ماتەلدەرى مەن قاناتتى سوزدەرى بارشىلىق، ولار ەل اۋزىندا ءالى كۇنگە ايتىلىپ ءجۇر. سولاردىڭ ءبىرى – «قاراشادا قار جاتپايدى، قار جاتسا تەك جاتپايدى» دەپ ايتىلادى. بۇل وسى ايدا جاۋعان قاردىڭ ماڭىزدىلىعىن بىلدىرەدى. «ەگەر قاراشانىڭ 20–25-تەرىندە قار جاۋىپ، ەرىمەي جاتىپ قالاتىن بولسا، ول قىستىڭ باستالعانىنىڭ ايقىن بەلگىسى» دەگەن دە كونەلەردەن قالعان بولجام بار.
بوزقىراۋ، قاۋىس، اققار امالدارى دا وسى ايدىڭ ەنشىسىندە. بىرەۋىن – بوزقىراۋدى اڭگىمەمىزگە ارقاۋ ەتتىك. قالعانىن كەزەگىمەن ءسوز ەتەمىز. بۇگىن كۇندەلىكتى كۇنتىزبە بويىنشا، قاراشانىڭ – 3ء-ى. جاڭا ايدىڭ باسى – 8ء-شى جاڭاسى. قازاقشا اي 5 كۇننەن كەيىن عانا باستالادى. وسى كەزدە اۋا رايىندا وزگەرىس ورىن الادى. مىنە، وسى وزگەرىستەردىڭ اسەرىنەن جاۋىن-شاشىن بولىپ، قار جاۋۋى ىقتيمال.