بالالاردىڭ قاۋىپسىزدىگى ءۇشىن الەۋمەتتىك جەلىلەرگە قاتىستى زاڭنامالىق شارالاردى كۇشەيتۋ ۇسىنىلدى.
ۇسىنىس اۆتورى – ءماجىلىس دەپۋتاتى جۇلدىز سۇلەيمەنوۆا قازاقستانداعى بالالار سۋيسيدىنە قاتىستى زاڭنامالىق شارالار قابىلداۋدى ۇسىندى، دەپ حابارلايدى aqshamnews.kz
دەپۋتاتى ءوز ۇستانىمىن Facebook جەلىسىندە ءبولىستى.
"سوڭعى كۇندەرى بالالارىمىزدىڭ وز-وزىنە قول جۇمساۋ فاكتىلەرى قوعامنىڭ قاتتى الاڭداۋشىلىعىن تۋدىرۋدا. بۇل جانتۇرشىگەرلىك قايعىلى جاعدايلار ەشكىمدى بەي-جاي قالدىرماعانى انىق. ايدىڭ-كۇننىڭ امانىندا جەلكىلدەپ ءوسىپ كەلە جاتقان ورەندەرىمىزدەن ايىرىلدىق. ومىردەن قىرشىن كەتكەن مارقۇمداردىڭ تۋىستارى مەن جاقىندارىنا كوڭىل ايتامىن. ءيا، رەسمي تەرگەۋ باستالدى. ءبىراق ءقازىردىڭ وزىندە مۇنىڭ ءبارى ناقتى ورىنداۋشىسى بار قىلمىس، كىسى ءولتىرۋ دەپ ايتۋعا بولادى. ايۋاندىقپەن قىلمىس جاساعانداردى، ياعني ارانداتۋشىلاردى انىقتاپ، زاڭدى تۇردە جازاعا تارتۋدى قۇقىق قورعاۋ ورگاندارى قاجەت بولسا حالىقارالىق ىزدەۋ جاريالاپ، ورىندايدى دەپ ۇمىتتەنەمىن"، دەدى جۇلدىز سۇلەيمەنوۆا.
دەپۋتاتتىڭ ايتۋىنشا، الەۋمەتتىك جەلىلەر مەن مەسسەندجەرلەر بۇل قىلمىستاردى جۇزەگە اسىرۋعا جاعداي جاساپ، ءالى تولىسا قويماعان جاسوسپىرىمدەردىڭ پسيحيكاسىنا كەرى اسەر ەتەتىن قۇرالعا اينالعان.
«ال ەندى وسى قىلمىستاردى ىسكە اسىرۋعا جاعداي تۋعىزىپ وتىرعان الەۋمەتتىك جەلىلەر مەن مەسسەندجەرلەر ەكەنىن اشىق اقپارات كوزدەرىنەن وقۋدامىز. ونى جالتاقتاماي ايتۋ قاجەت دەپ سانايمىن. ولار ساناسى ءالى قاتپاعان جەتكىنشەكتەرىمىزدىڭ پسيحيكاسىنا تەرىس اسەر ەتەتىن قۇرالعا اينالدى. ەڭ سوراقىسى سول، بۇل ويىندار مەن كۆەستتەر پسيحولوگيالىق تۇرعىدان ايتقانعا كوندىرۋ داعدىلارىن قولدانا وتىرىپ، كاسىبي تۇردە جاسالۋدا. ءبىراق، ەڭ باستىسى، مۇنى مەن ۇستاز رەتىندە، انا رەتىندە، دەپۋتات رەتىندە ايتامىن – مەملەكەت پەن قوعام الەۋمەتتىك جەلىلەر مەن مەسسەندجەرلەردىڭ اكىمشىلەرىنەن تارالىپ جاتقان اقپاراتقا باقىلاۋدى كۇشەيتۋىن تالاپ ەتۋى كەرەك دەپ سانايمىن. تارالىپ جاتقان زاڭسىز، زياندى، بۇلدىرشىندەردىڭ ساناسىن ۋلايتىن جۇكتەمەلەرگە باقىلاۋدى وقىس كۇشەيتۋدى قاتاڭ تالاپ ەتۋ كەرەك. جاۋاپتى مينيسترلىك مەكتەپتەردەگى پسيحولوگيالىق قىزمەتتەردىڭ جۇمىس الگوريتمدەرىن وزگەرتۋى ءتيىس. ولار بالالاردىڭ مىنەز-قۇلقىنداعى جانە ءجۇرىس-تۇرىسىنداعى بەلگىلەردى ۋاقتىلى انىقتاۋدا ءتيىمدى قۇرال بولۋى كەرەك. ەگەر مۇنداي تالاپ ورىندالمايتىن بولسا، وندا مەملەكەت باقىلاۋدى كۇشەيتسىن. بارلىق ءقاۋىپتى كونتەنتكە قاتاڭ توسقاۋىل قويىلسىن. ال جەكەلەگەن كونتەنتكە توسقاۋىل قويۋعا قول جەتكىزۋ مۇمكىن بولمايتىن بولسا، وندا ناقتى زاڭ بۇزعان الەۋمەتتىك جەلى نەمەسە مەسسەندجەر بۇعاتتالۋى كەرەك،- دەپ باسا ايتتى دەپۋتات.