وقۋ-اعارتۋ ءبىرىنشى ۆيسە-مينيسترى ناتاليا جۇمادىلدايەۆا قازاقستاندا بارلىق ءمۇعالىم نەگە اتتەستاسيادان وتەتىنىن ءتۇسىندىردى، دەپ حابارلادى اlmaty-akshamy.kz.
ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ءمينيستردىڭ ورىنباسارىنا «مۇعالىمدەر تاپسىراتىن اتتەستاسيانىڭ مىڭ قۇبىلىپ، وزگەرىپ جاتقانى تۋرالى ايتىلىپ جاتىر. پەداگوگ-زەرتتەۋشىلەر ءوز ساناتىندا قالسا، تەست تاپسىرمايتىنى ايتىلعان. كەيىن ونىڭ ءبارىن الىپ تاستاپ، ولار قايتادان تەست تاپسىراتىن بولدى. اتتەستاسيادا نەگە ناقتىلىق جوق؟ ول قاشان ءبىر جۇيەگە قويىلادى؟» دەگەن سۇراق قويىلدى.
ناتاليا جۇمادىلدايەۆا بارلىق ماسەلە جۇمىس توبىندا قارالعانىن اتاپ ءوتتى.
پەداگوگتەردى اتتەستاتتاۋدىڭ جاڭا ەرەجەسىن ازىرلەۋ بويىنشا جۇمىس توبى قۇرىلعان. ونىڭ قۇرامىنا 60-تان اسا ادام بار: پەداگوگتار، ءبىلىم بەرۋ سالاسىنداعى ۇكىمەتتىك ەمەس ۇيىمداردىڭ وكىلدەرى. جۇمىس توبىندا 44 رەت كەزدەسۋ وتكىزىلدى. وندا ءارتۇرلى ماسەلە قاراستىرىلىپ، ءارتۇرلى زەرتتەۋلەر مىسالعا كەلتىرىلدى. وسىعان بايلانىستى كوپتەگەن نورما قابىلداندى. مۇنداي شەشىم ءبىزدىڭ پەداگوگيكالىق قاۋىمداستىقپەن بىرگە قابىلداندى.
ەندى مۇعالىمدەردىڭ تىلەگىنە توقتالايىن. مۇندا ولاردىڭ تىلەگى، جاڭا ەرەجەگە قاتىستى كوزقاراسى ۇكىمەتتىك ەمەس ۇيىمداردىڭ وكىلدەرىمەن سايكەس كەلمەدى. جۇمىس توبىندا ولار (ۇكىمەتتىك ەمەس ۇيىمدار وكىلدەرى) ارگۋمەنتتەر كەلتىرىپ، تەست تاپسىرىپ، تاعى ءبىر تولىق اتتەستاسيادان وتكىزۋدىڭ قاجەتى بار ەكەنىن دالەلدەدى، - دەدى ۆيسە-مينيستر.
وقۋ-اعارتۋ مينيسترلىگى پرەزيدەنتتىڭ تاپسىرماسى بويىنشا پەداگوگتىڭ ۇزدىكسىز كاسىبي دامۋى بويىنشا جاڭا ءتاسىل ازىرلەگەن. وسىعان بايلانىستى بارلىق ءمۇعالىم اتتەستاسيادان وتەدى.
2025 جىلعى 1 قاڭتاردان باستاپ پەداگوگتارىمىزدىڭ ەڭبەك تيىمدىلىگى «ۇستاز» ەلەكتروندى پلاتفورماسىندا باعالانادى. پلاتفورما تولىق سيفرلاندىرىلىپ، پەداگوگ قىزمەتىنىڭ تيىمدىلىگىنە مونيتورينگ جۇرگىزۋگە مۇمكىندىك بەرەدى. مۇندا پەداگوگتىڭ پراكتيكالىق قىزمەتىنە باسىمدىق بەرىلەدى. بۇل – ءمۇعالىمنىڭ ساباعىن تالداۋ، وقىتۋ ادىستەرىن ءتيىمدى قولدانا ءبىلۋ، سىنىپتارداعى وقىتۋ ساپاسى.
پلاتفورماعا ءوتۋ ءۇشىن ءمۇعالىمنىڭ ءپاندى قانشالىقتى دەڭگەيدە بىلەتىنى باعالانادى، پەداگوگيكا مەن ادىستەمە ماسەلەسى پراكتيكاعا جاتقىزىلادى. سوندىقتان جۇمىس توبىندا پەداگوگتار 2025 جىلعى قاڭتارعا دەيىن وتپەلى كەزەڭنەن ءوتىپ، پاندىك ءبىلىمى جانە وقىتۋ ادىستەمەسى، پسيحولوگيا بويىنشا تەست تاپسىرىپ، اتتەستاسيادان وتەدى»، - دەدى ناتاليا جۇمادىلدايەۆا.