كوركەم گيمناستيكادان قازاق سپورتشىلارى اراسىندا وليمپيادا ويىندارىنا العاش قاتىسقان ءاليا يۋسۋپوۆا مەرەيلى 40 جاسقا تولدى، دەپ حابارلايدى اlmaty-akshamy.kz.
ۇزاق جىلدار بويى ۇلكەن ارەنالاردا ەل نامىسىن قورعاعان ول ۇلكەن سپورتتا نەسىمەن ەستە قالدى؟
ءاليا يۋسۋپوۆانىڭ ەسىمى قازاق گيمناستيكاسىن جاڭا دەڭگەيگە كوتەرگەن سپورتشى رەتىندە اتالادى. ول كاسىبي مانسابىندا كوپتەگەن جەتىستىكتىكتەرگە يە بولىپ، ەكى وليمپياداعا قاتىستى.
سپورتشى 1984 جىلى 15 مامىردا شىمكەنت قالاسىندا دۇنيەگە كەلگەن. كوركەم گيمناستيكادان جەكە جاتتىعۋ بويىنشا 2000-2009 جىلدارى ارالىعىندا ەلىمىزدىڭ ءابساليۋتتى چەمپيونى اتانىپ، ۇزدىك ەكەنىن دالەلدەي الدى.
2004 جىلى افينى وليمپياداسىندا ءتورتىنشى ورىنعا تۇراقتاپ، ازيا چەمپيوناتىندا 12 مارتە جەڭىمپاز اتانعان. سونداي-اق، ازيا ويىندارىنىڭ ەكى دۇركىن چەمپيونى جانە كۇمىس جۇلدەگەرى. بۇدان بولەك، ۋنيۆەرسيادا ويىندارىندا 4 قولا جۇلدەنى ەنشىلەدى.
ءاليا يۋسۋپوۆا كاسىبي سپورتتى اياقتاعان سوڭ شىمكەنت قالاسىندا كوركەم گيمناستيكا مەكتەبىن اشىپ، باپكەرلىكپەن اينالىستى. كەيىن ۇلتتىق قۇراماعا جەتەكشىلىك ەتىپ، شاكىرتتەرى حالىقارالىق جارىستاردا جاقسى ناتيجەگە قول جەتكىزدى. ال 2021 جىلدىڭ باسىنان بەرى ول فەدەراسيا پرەزيدەنتى رەتىندە قىزمەتىنى جالعاستىرىپ كەلەدى.
ءاليا يۋسۋپوۆا بۇعان دەيىن بەرگەن سۇحباتتارىندا جاتتىعۋ كەزىندە العان جاراقاتىنا بايلانىستى سپورتتان كەتۋدى ويلاعانىن ايتقان بولاتىن.
«افينى وليمپياداسىنا بارۋ ءۇشىن مەن وتە اۋىر جولدان ءوتتىم. 2002 جىلى پۋسانداعى ازيا ويىندارىنا قاتىسىپ، كوماندالىق سىندا ەكىنشى ورىن يەلەندىك. ال مەن جەكەلەي جارىستا كۇمىس جۇلدەگەر اتاندىم. سول باسەكەدەن كەيىن سول اياعىمدى قاتتى جاراقاتتاپ العانمىن. وتا جاساۋعا تۋرا كەلدى. قاتتى اۋىرعانى سونشا، سول اياعىمدى سۇيرەتىپ جۇرەتىنمىن. مۇنى كورگەن اكەم سپورتپەن قوشتاسۋىمدى سۇرادى. ويتكەنى، مەنىڭ جۇرە الماي قالعانىمدى كورۋ ولارعا اۋىر ەدى. ءبىراق مەن بارىنە شىدادىم. 2003 جىلى ءۇش اي جاتتىعۋ جاساۋعا رۇقسات بەرگەن جوق. وسى ساتتە ماعان سەنبەي، ورنىما باسقا سپورتشىنى جىبەرگىسى كەلگەندەر دە بولدى. الايدا، جەكە باپكەرىم ەكاتەرينا پانچەنكو مەن يرينا ۆينەر مەنىڭ ءبارىن جەڭەتىنىمە سەندى. جايلاپ جاراقاتتان ايىعىپ، جارىستارعا قاتىسىپ، افينى وليمپياداسىنا جولداما الدىم. ال ءتورتىنشى ورىن مەن ءۇشىن جەڭىسكە پارا پار»، - دەگەن ەدى ول سۇحباتىندا.
وتانداسىمىز جاسىنا قاراماستان كوركەم گيمناستيكادا ۇزاق ءجۇردى. ادەتتە بۇل سپورتتاعىلار 20 جاسىندا كاسىبي مانسابىن اياقتاپ جاتادى. بۇل رەتتە ول 26 جاسىنا دەيىن ونەر كورسەتتى.
ال باپكەرلىك قىزمەتكە كەلەردە ءاليا اكەسىمەن كەڭەسىپ، ءبىر شەشىمگە كەلگەن.
«سپورتتان كەتكەن سوڭ، جاتتىقتىرۋشىلىق قىزمەتتى قولعا الدىم. بۇل ءىستى باستار الدىندا اكەم اقىلىن ايتتى. جاقسى سپورتشىدان جاقسى باپكەر شىقپاۋى مۇمكىن ەكەنىن ەسكەرتتى. مەن ويلانا كەلە، مۇنىڭ ءبارىن ءىس جۇزىندە بايقايىق دەپ شەشتىم»، - دەدى وتاندىق باق-قا بەرگەن سۇحباتىندا.