ەكى جىل بۇرىن پرەزيدەنتتىڭ تاپسىرماسىمەن «جايلى مەكتەپ» ۇلتتىق جوباسى باستالدى.
بۋرابايدا ءوتىپ جاتقان ۇلتتىق قۇرىلتاي بارىسىندا پرەزيدەنت قاسىم-جومارت توقايەۆ اتالعان جوباعا قاتىستى ءبىرقاتار تاپسىرما بەردى، دەپ حابارلايدى aqshamnews.kz.
اقمولا وبلىسى ۇلتتىق جوبا بويىنشا سالىناتىن بارلىق مەكتەپتىڭ قۇرىلىسىن ءبىرىنشى بولىپ اياقتادى. ايماقتا 12 مىڭنان استام وقۋشىعا ارنالعان جاڭا ءبىلىم وشاقتارى اشىلدى.
«باسقا وبلىستاردا قۇرىلىس بارىسى ءماز ەمەس. ۇكىمەت پەن «سامۇرىق-قازىنا» قورى بۇل جۇمىستى قولعا الۋى كەرەك. مەن تاياۋ ارادا تەكسەرەمىن»، -دەدى مەملەكەت باسشىسى.
بيىل ەلىمىزدە 500 مىڭ وقۋشىعا ارنالعان ەكى جۇزدەن استام مەكتەپ سالىنادى. «جايلى مەكتەپ» جوباسىنا قاتىستى پرەزيدەنت قاپەردە ۇستاۋ قاجەت ءبىر جايتتى ايتتى.
«بارلىق جەردە تەك «جايلى مەكتەپ» جوباسى اياسىندا مەكتەپ سالۋ مىندەتتى ەمەس. ساپالى سالىنعان قاراپايىم مەكتەپتەرگە دە سۇرانىس جوعارى. ءۇش جىلدا 1300، سونىڭ ىشىندە اۋىلداعى 900 ءبىلىم ورداسىن جاڭعىرتۋ قاجەت. جاڭا وقۋ جىلىنا دەيىن مەملەكەتتىك جانە جەكەمەنشىك مەكتەپتىڭ بارلىعى بالالاردىڭ قاۋىپسىزدىگىن قامتاماسىز ەتەتىن ارنايى قۇرالدارمەن جابدىقتالۋعا ءتيىس»، - دەدى پرەزيدەنت.