قازىرگى تاڭدا ەلىمىزدە بىرنەشە ءىرى ينفراقۇرىلىمدىق جوبالار ىسكە اسىرىلۋدا. بۇل تۋرالى پرەزيدەنت ۇلتتىق قۇرىلتايدا سويلەگەن سوزىندە مالىمدەدى. 2025-2026 جىلدارى قاشاعان كەنىشىندە گاز وڭدەۋ زاۋىتى ىسكە قوسىلىپ، «تالدىقورعان – ءۇشارال» جانە «بەينەۋ–بوزوي-شىمكەنت» گاز قۇبىرلارىنىڭ ەكىنشى جەلىسى پايدالانۋعا بەرىلەدى.
سونىمەن قاتار، ۇكىمەت قىزىلوردا جانە تۇركىستان وبلىستارىندا بۋ-گاز قۇرىلعىسىنا نەگىزدەلگەن جاڭا ەلەكتر ستانساسىن سالۋدى جوسپارلاپ وتىر. الماتىداعى جەو-2 جانە جەو-3 جاڭعىرتىلاتىن بولادى.
پرەزيدەنتتىڭ ايتۋىنشا، «كەندىرلى» دەمالىس ايماعىندا سۋ تۇششىتاتىن زاۋىت ىسكە قوسىلادى. بۇل زاۋىت جاڭاوزەن قالاسىن اۋىز سۋمەن تۇراقتى قامتاماسىز ەتەتىن بولادى. قاراعاندى جانە ەكىباستۇز قالالارىندا بولات قورىتاتىن زاۋىتتار مەن جامبىل وبلىسىندا مينەرالدى تىڭايتقىش وندىرەتىن حيميا كەشەنى پايدالانۋعا بەرىلەدى.
الماتى مەن قوستاناي وبلىستارىندا جاڭا اۆتوكولىك زاۋىتتارى اشىلىپ، ەل ەكونوميكاسىنا سەرپىن بەرەدى. سونداي-اق، «دوستىق-مويىنتى» تەمىر جول ۋچاسكەسىنىڭ جانە الماتى بەكەتىن اينالىپ وتەتىن تەمىر جول جەلىسىنىڭ قۇرىلىسى اياقتالادى.
اقتاۋدا كاسپيي تەڭىزىنىڭ جاعالاۋىندا كونتەينەر حابى سالىنىپ، «قورعاس – شىعىس قاقپا» ەەا اۋماعىندا حالىقارالىق اۋەجاي جۇمىس ىستەي باستايدى. زايسان، كاتونقاراعاي مەن كەندىرلى دەمالىس ايماقتارىندا دا جاڭا اۋەجايلار اشىلادى.
پرەزيدەنت ءوز سوزىندە كاسپيي تەڭىزىنىڭ ۇلتانىمەن تالشىقتى-وپتيكالىق بايلانىس جەلىسىن تارتۋ جوسپارلانىپ وتىرعانىن اتاپ ءوتتى. بۇل جوبا ەۋروپا مەن ازيا اراسىنداعى سيفرلىق ءدالىزدى قالىپتاستىرۋعا مۇمكىندىك بەرەدى. سونىمەن قاتار، ەلىمىزدىڭ اۆتوكولىك جولدارى جەلىسىن دامىتۋ جۇمىستارىنىڭ ماڭىزى ەرەكشە ەكەندىگى دە ايتىلدى.