الماتىدا سانيتاريالىق-ەپيدەميولوگيالىق مەملەكەتتىك قىزمەتتەر قولجەتىمدى تۇردە كورسەتىلۋدە

الماتى بولىمشەلىك كولىكتەگى سانيتاريالىق-ەپيدەميولوگيالىق باقىلاۋ باسقارماسىنىڭ نەگىزگى مىندەتتەرىنىڭ ءبىرى – حالىققا ساپالى مەملەكەتتىك قىزمەت كورسەتۋ. بۇل قىزمەتتەر ەلىمىزدىڭ زاڭناماسىنا سايكەس، ازاماتتاردىڭ قۇقىقتارىن قورعاۋ جانە سانيتاريالىق-ەپيدەميولوگيالىق قاۋىپسىزدىكتى قامتاماسىز ەتۋ ماقساتىندا جۇزەگە اسىرىلادى.

مەملەكەتتىك قىزمەت كورسەتۋ بارىسىندا تەڭ قولجەتىمدىلىك، اشىقتىق، تيىمدىلىك جانە تورەشىلدىككە جول بەرمەۋ قاعيداتتارى قاتاڭ ساقتالادى. بارلىق قىزمەتتەر "ەلەكتروندىق ۇكىمەت" پورتالى (www.egov.kz، www.elicense.kz) ارقىلى كورسەتىلىپ، جەكە جانە زاڭدى تۇلعالارعا تەگىن ۇسىنىلادى.

الماتى بولىمشەلىك كولىكتەگى سانيتاريالىق-ەپيدەميولوگيالىق باقىلاۋ باسقارماسى تەمىرجول، سۋ، اۋە كولىكتەرى جانە مەتروپوليتەن نىساندارىنا قاتىستى مىناداي ءۇش مەملەكەتتىك قىزمەتتى كورسەتەدى:

1. ەپيدەميولوگيالىق ماڭىزى جوعارى نىساندارعا سانيتاريالىق-ەپيدەميولوگيالىق قورىتىندى بەرۋ.
2. قورشاعان ورتاعا زياندى زاتتاردىڭ اسەرى مەن ونىمدەردىڭ نورماتيۆتىك تالاپتارعا سايكەستىگىن راستايتىن سانيتاريالىق-ەپيدەميولوگيالىق قورىتىندى بەرۋ.
3. تاماق ونىمدەرىن ءوندىرۋ نىساندارىنا ەسەپتىك ءنومىر بەرۋ جانە ولاردىڭ ءتىزىلىمىن جۇرگىزۋ.

ازاماتتار مەملەكەتتىك قىزمەت كورسەتۋ مارتەبەسىن "جەكە كابينەت" ارقىلى نەمەسە 1414، 8 800 080 7777 ءبىرىڭعاي بايلانىس ورتالىعىنا حابارلاسىپ بىلە الادى. سونداي-اق، ناشار كورەتىندەرگە ارنالعان ارنايى نۇسقا پورتال ارقىلى قولجەتىمدى.

قىزمەت كورسەتۋگە ءوتىنىش بىلدىرگەن كەزدە كەيبىر جاعدايلاردا زاڭناماعا سايكەس باس تارتىلۋى مۇمكىن. وعان كەلەسى سەبەپتەر جاتادى:

• ۇسىنىلعان قۇجاتتار مەن مالىمەتتەردىڭ دۇرىس بولماۋى؛
• سانيتاريالىق-ەپيدەميولوگيالىق تالاپتارعا سايكەس كەلمەۋى.

مەملەكەتتىك قىزمەتتەر تۋرالى تولىق اقپارات gov.egov.kz پورتالىندا ورنالاستىرىلعان. الماتى بولىمشەلىك كولىكتەگى سانيتاريالىق-ەپيدەميولوگيالىق باقىلاۋ باسقارماسى حالىققا قولجەتىمدى جانە ساپالى قىزمەت كورسەتۋدى جالعاستىرادى.