ەرلان قارين بۇگىنگى پرەزيدەنت ءسوزىنىڭ نەگىزگى ءتۇيىنىن تارقاتىپ بەردى
«مەملەكەت باسشىسى اسسامبلەيادا سويلەگەن سوزىندە مەملەكەتتىك قۇرىلىستىڭ ىرگەتاسى ەتنوسارالىق كەلىسىم مەن بىرلىككە نەگىزدەلەتىنىن اڭعارتتى. ەتنوسارالىق قاتىناس باعىتىنداعى مەملەكەتتىك ساياساتتىڭ تيىمدىلىگىن ارتتىرۋ ءۇشىن كەشەندى مىندەتتەر قويىلدى. پرەزيدەنت ءسوزىنىڭ نەگىزگى ءتۇيىنى مىنانداي تۇجىرىمعا سايادى: جالپىۇلتتىق بىرەگەيلىكتى الەۋمەتتىك-ساياسي، ەكونوميكالىق جانە رۋحاني قۇندىلىقتاردى نەگىزگە الا وتىرىپ، تابيعي ءارى تاريحي جولمەن قالىپتاستىرۋ جانە دامىتۋ كەرەك»، - دەپ جازادى ەرلان قارين Telegram پاراقشاسىندا.
پرەزيدەنتتىڭ ايتۋىنشا، «ءبىزدىڭ بارشا حالقىمىز وزدەرىن ۇلكەن جانە ءبىرتۇتاس قازاق ۇلتىنىڭ اجىراماس بولىگى رەتىندە سەزىنەدى»، «ونداعى ءاربىر ەتنوس دوستىقتى، ۇيلەسىمدىلىك پەن كەلىسىمدى نىعايتۋعا باعا جەتپەس ۇلەس قوسىپ وتىر».
وسى ورايدا مەملەكەت باسشىسى جالپىۇلتتىق بىرەگەيلىكتىڭ نىشاندارىن تاعى ءبىر مارتە اتاپ ءوتتى.
«ءبىرىنشىسى - ازاماتتىق بىرەگەيلىگىمىزدى تانىتاتىن كوك ءتولقۇجات. بۇل بارلىق ازاماتتىڭ تەڭ جانە مەملەكەتتىڭ قورعاۋىندا ەكەنىن كورسەتەدى. ەكىنشىسى - قازاقستاننىڭ تاۋەلسىزدىگىن، ونىڭ عاسىرلار بويى جالعاسىپ كەلە جاتقان مەملەكەتتىلىگىن بەينەلەيتىن اسپان تۇستەس كوك بايراق»، - دەيدى مەملەكەتتىك كەڭەسشى.