بۇل ماسەلەدەن پانفيلوۆ اۋىلدىق وكرۋگىنىڭ اكىمدىگى حاباردار
الماتى وبلىسىندا 5 قاباتتى قوس ءۇيدىڭ تۇرعىندارى 30 جىل بويى پەش جاعىپ كەلەدى. ورتالىق جىلۋ جۇيەسىنەن اجىراپ قالعان 80 وتباسى بيىل دا قىستىڭ قامىنا ەرتە كىرىسپەك. ويتكەنى بىرىنە كومىر ءتۇسىرىپ، بىرىنە سولياركا تاسىپ، ال قالعاندارىنا گاز باللونىن ساتىپ الۋ كەرەك، دەپ حابارلايدى Almaty-akshamy.kz Almaty.tv-گە سىلتەمە جاساپ.
سىرت كوزگە بارلىق جاعدايى جاسالعان 5 قاباتتى ءۇي بولىپ كورىنگەنىمەن، كەم-كەتىكتى مۇنداعى تۇرعىندار جاقسى بىلەدى. ال كوككە قاراپ تۇرعان مۇرجالاردان ءۇيدىڭ وتپەن جىلىناتىنىن بايقاۋعا بولادى.
مۇرات بەكمۇراتوۆ ەل-جۇرت سەكىلدى بالكونىنا قاجەتسىز زاتتاردى جيناي المايدى. ويتكەنى ورنىندا قىستا جىلۋ بەرەتىن ۇلكەن پەش پەن وت جاعۋعا قاجەتتى قۇرالدار تۇر. كۇز كەلسە 3 بالانىڭ اكەسىنەن مازا قاشادى. سەبەبى كومىر ساتىپ الۋدان بولەك، وتىن جاعۋ ءۇشىن شىنىعىپ، دايىندالۋ كەرەك دەيدى. ول 50 شارشى مەترلىك پاتەردى قىس بويى جىلى ۇستاپ تۇرۋ ءۇشىن 3 توننا كومىر كەتەدى دەپ وتىر. ال بالالار وينايتىن اۋلا كومىر تۇسىرەتىن ورىنعا اينالعان.
«سولياركا قىمبات. توقپەن ءۇي جىلىمايدى، تەك كومىرمەن. ءبىراق كومىردى 5 قاباتقا كوتەرىپ شىعارۋ كومىر قيىنداۋ. مىنا كوپ قاباتتى ۇيدە 40 پاتەر بار، ولاردىڭ ءارقايسىسىندا ءبىر-بىر گاز باللوننان تۇر»، – دەدى پانفيلوۆ اۋىلدىق وكرۋگىنىڭ تۇرعىنى مۇرات بەكمۇراتوۆ.
جۇرت قىستا قانداي وتىن ءتۇرىن جاعاتىنىن بىلمەي دال. مۇنداعى حالىق قالتاعا قاراي كوسىلەدى. تۇرعىندار ءبىر-بىرىنىڭ جىلداعى كەتكەن شىعىنىن ەسەپتەپ، ىشىنەن ءتيىمدىسىن تاڭدايدى ەكەن. باسىم كوپشىلىگى كومىر جاقسا، ەندى ءبىرى گاز باللونىمەن جىلىنادى. ال قالعانى سولياركا قولدانادى ەكەن.
«ءبارى دە گاز باللونمەن وتىر. ءار ۇيدە ءبىر باللون كەم دەگەندە. گازبەن جاعاتىندار دا 5-6 باللوننان بار.ەگەر دە ولار جارىلاتىن بولسا، بۇل ۇيلەردەن ەشتەڭە قالمايدى. قۇداي ساقتاسىن، جارىلماسىن. ونداي جامانشىلىق بولماسىن»، – دەدى پانفيلوۆ اۋىلدىق وكرۋگىنىڭ تۇرعىنى بولات ەلىكبايەۆ.
بۇل ماسەلەدەن پانفيلوۆ اۋىلدىق وكرۋگىنىڭ اكىمدىگى حاباردار. مۇنداي جاعداي وسىنداعى كورشى ەلدىمەكەندە دە بار. سوندا باس-اياعى 26 ءۇي ورتالىق جىلۋ جۇيەسىنە قوسىلماعان. جاعدايدى شەشۋ ءۇشىن 4 جىلۋ قازاندىعىن سالۋ ۇسىنىلىپتى. وعان شامامەن 250 ميلليونداي قاراجات كەرەك. ازىرگە سمەتالىق قۇجاتتاما دا دايىن ەمەس.
وكىنىشتىسى، تۇرعىندار بيىل دا ورتالىق جىلۋ جۇيەسىنە قوسىلا المايدى. سوندىقتان قىستىڭ قامىنا ەرتەرەك كىرىسكەندەرى دۇرىس.