Мәжіліс депутаты Ермұрат Бәпи кеше кулуарда журналистерге қымбатшылық мәселесіне қатысты пікір білдірді. Бұл қоғамда қызу талқыланған еді. Ол аймақтарды аралаған кезде "қатты қиындық көріп жүрген халықты байқамағанын" айтқан болатын. Депутат бұл сөзін Aqshamnews.kz тілшісіне түсіндіріп, әлеуметтік желіде таралған видеодағы контексттің бұрмаланғанын айтты.
"Әлеуметтік желіге кесіліп кеткен. Маған журналист "сайлаушылармен кездесуде қымбатшылыққа қамалған адамдарды көрдіңіз бе?" деді. Сұрақтың басы кесіліп қалған. Қандай сұрақ – сондай жауап. Мен көрмедім дедім. Кездесуде қымбатшылық мәселесін көтерген адам болмады. Ал негізінде қымбатшылық бар, ол әлемдік тренд болып кеткен. Америка, Еуропа, мысалы көршіміз Ресейде бензиннің 1 литрі 1 долларға жетті. Ал мұны тоқтатудың амалын Үкімет жасауы керек. Базар мен алаң арасындағы делдалдарды азайту керек. Өйткені егіс даласынан тауар "Көк базарға" жетемін дегенше 4-5 делдалдан өтеді", – деді ол.
Бірақ депутат қымбатшылықты сезінетінін мойындады.
"Әрине, біз енді аптасына бір рет базарға барамыз. Бірақ қалтамды қағып жатыр деп те айта алмаймын. Отбасында екі адамбыз. Балалар өсіп кетті. Қиналып, зардап шегіп, зар илеп жүрмін деп айта алмаймын", – деді Бәпи.
Бұл пікір қоғамда қызу пікірталас туғызды. Депутат қымбатшылық мәселесін шешу үшін Үкіметке нақты қадамдар қажет екенін, әсіресе делдалдар санын азайту керектігін алға тартты.
Еске салайық, Ермұрат Бәпи кеше кулуарда журналистерге аймақтарды аралаған кезде "қатты қиындық көріп жүрген халықты байқамағанын" айтқан болатын.
"Әрине, әңгіме бар ол жерде. Қымбатшылық туралы әңгіме қай жерде болсын бар. Бірақ жалпы менің өзім Шығыста болдым, Семейде болдым. Алматы облысында болдым. Біраз жерде болдым. Сондай бір қатты қиыншылыққа тап болған халық бар – деген сөз көрген жоқпын. Бірақ, жекелеген бір отбасылар бар екен", – деді депутат.