اتالمىش تۋىندى 1995-1996 جىلدارداعى ءبىلىم-عىلىم سالاسىندا جۇرگەن جانداردىڭ ءومىر جولىن بەينەلەيدى.
«الماتى» تەلەارناسىنىڭ جاڭا ماۋسىمىندا «باقىتتىمىن وزىڭمەن» اتتى تەلەحيكايا جارىققا شىعادى. اتالمىش تۋىندى 1995-1996 جىلدارداعى ءبىلىم-عىلىم سالاسىندا جۇرگەن جانداردىڭ ءومىر جولىن بەينەلەيدى، دەپ حابارلايدى Almaty-akshamy.kz.
«باقىتتىمىن وزىڭمەن» تەلەحيكاياسىندا مەن ايبەك اۋكەنوۆ دەگەن كەيىپكەردىڭ ءرولىن سومدايمىن. بۇل تۋىندى 1995-1996 جىلدار ارالىعىن قامتيدى. ايبەك – اۋىلدا وسكەن، وتە مومىن، ءوز ارمانىن ساتپايتىن جىگىتتەردىڭ ءبىرى. ول اۋىلدا مەكتەپتە تاريح پانىنەن ساباعاق بەرەدى. وعان الماتىعا كەلىپ ءبىلىمىن جالعاستىرىپ، ديسسەرتاسيا قورعاۋعا مۇمكىندىك تۋادى. ول الىپ شاھارعا كەلگەندە بۇرىنعى دوستارى بۇرىس جولعا ءتۇسىپ كەتكەن ەكەن. قىزىق وقيعانىڭ ءبارى الماتىدا باستالادى»، – دەيدى اكتەر ەلدوس شاكەنوۆ
اكتەردىڭ ايتۋىنشا، فيلم بارىسىندا ايبەكتىڭ اقىلىمەن دوستارى ءتۇرلى كاسىپ يگەرىپ، تاۋەلسىز قازاقستاننىڭ دامۋىنا وزىندىك ۇلەسىن قوسادى.
«ايبەك ەلباسى نۇرسۇلتان نازاربايەۆتىڭ كوپتەگەن جارلىعىن ورىنداي وتىرىپ، قازاقستاننىڭ سول زاماندا دامىپ كەتكەنىن كورسەتەدى. ايبەك عىلىم جولىنا ءتۇسىپ، ينستيتۋتتا ساباق بەرىپ، پروفەسسورلىققا دەيىن كوتەرىلەدى»، – دەيدى اكتەر.
«باقىتتىمىن وزىڭمەن» سەريالىندا ايبەكتىڭ عاشىعى بولىپ اكتريساسى اراي قۇسايىنوۆا وينايدى.
«مەن 22-23 جاستاعى روزا ەسىمدى كەيىپكەردىڭ ءرولىن سومدايمىن. كەيىپكەردىڭ جان دۇنيەسى وزىمە جاقىن، اقىلدى جانە وتە ءبىلىمدى قىز. ءتۇسىرىلىم بارىسى وتە قىزىق ءوتىپ جاتىر. بۇل مەنىڭ ەكىنشى جوبام. ءتۇسىرىلىم بارىسى ماعان قيىندىق تۋدىرمادى. رولگە بىردەن ءسىڭىپ كەتە الدىم»، – دەدى اكتريساسى اراي قۇسايىنوۆا.
ايتا كەتەيىك، «باقىتتىمىن وزىڭمەن» تەلەحيكايانىڭ ماقساتى – كورەرمەنگە تاۋەلسىزدىك جولىندا قاراپايىم ەڭبەك ادامدارىنىڭ، ەلىمىزدىڭ ءبىلىم-عىلىم سالاسىندا جۇرگەن جانداردىڭ ءومىر جولىن، قيىندىقتى جەڭىپ شىققان ساتتەرىن كورسەتۋ.
تەلەحيكايا 4 قازاننان باستاپ، دۇيسەنبى-جۇما ارالىعىندا ساعات 20:40-تا «الماتى» تەلەارناسىنان كورسەتىلەدى.