بۇگىن – تۇركى دۇنيەسى ىنتىماقتاستىق كۇنى

تۇركى تىلدەس مەملەكەتتەردىڭ ىنتىماقتاستىق كەڭەسى تاراپتار اراسىنداعى ءوزارا سەنىم، دوستىق پەن تاتۋلىقتى نىعايتادى.

تۇركى تىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى قول قويىلعان ناحچىۆان كەلىسىمىنە بيىل 12 جىل تولىپ وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
2009 جىلدىڭ 3 قازانىندا ءازىربايجان رەسپۋبليكاسىنىڭ ناحچىۆان قالاسىندا وتكەن تۇركىتىلدەس مەملەكەتتەر باسشىلارىنىڭ IX سامميتىندە قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ تۇركى دۇنيەسىن زەرتتەيتىن حالىقارالىق عىلىمي ورتالىق قۇرۋ تۋرالى ۇسىنىس جاسادى. بۇل كەلىسىمنىڭ قابىلدانۋى تۇركى حالىقتارىنىڭ بىرلىگىن نىعايتۋدى كوزدەگەن ايماقتىق ءھام ەلارالىق بىرلەستىكتى قۇرۋعا نەگىز قالادى.
تۇركى تىلدەس مەملەكەتتەردىڭ اقساقالدار كەڭەسى تمىك اياسىندا جۇمىس ىستەيتىن، تۇراقتى تۇردە ارەكەت ەتەتىن كونسۋلتاتيۆتىك-كەڭەسشى ينستيتۋت رەتىندە جۇمىس اتقارىپ كەلەدى. باۋىرلاس ەلدەردىڭ ەرىكتى تۇردە قۇرعان بىرەگەي حالىقارالىق عىلىمي ۇيىمى — «حالىقارالىق تۇركى اكادەمياسى» 2014 جىلدىڭ 28 تامىزىنان باستاپ حالىقارالىق مارتەبەگە يە بولدى.
حالىقارالىق تۇركى اكادەمياسى تۇركى كەڭەسى، تۇركپا، تۇركسوي جانە يۋنەسكو حالىقارالىق ۇيىمىمەن، سونداي-اق يسلام تاريحى، ونەرى مەن مادەنيەتىن زەرتتەۋ ورتالىعىمەن (IRCICA) دە ارىپتەستىك ورناتتى.
تۇركى تىلدەس مەملەكەتتەردىڭ ىنتىماقتاستىق كەڭەسى تاراپتار اراسىنداعى ءوزارا سەنىم، دوستىق پەن تاتۋ كورشىلىكتى نىعايتۋدى، وڭىردە جانە تۇتاس الەمدە بەيبىتشىلىكتى قولداۋ جانە قاۋىپسىزدىك پەن سەنىمدى ارتتىرۋدى، سونداي-اق ورتاق مۇددە تۋدىراتىن سىرتقى ساياسي ماسەلەلەر بويىنشا، ونىڭ ىشىندە حالىقارالىق ۇيىمدار شەڭبەرىندە جانە حالىقارالىق فورۋمداردا ورتاق كوزقاراستى ىزدەستىرۋدى، تۇركى حالىقتارىنىڭ ۇلى مادەني-تاريحي مۇراسىن ناسيحاتتاۋدى كوزدەيدى.

قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ تۇركى تىلدەس مەملەكەتتەردىڭ ىنتىماقتاستىق كەڭەسىنىڭ ەكىنشى سامميتىندە: «تۇركى اكادەمياسىنىڭ، مادەني مۇرا قورىنىڭ قۇرىلۋى ءبىزدىڭ جاستارىمىزدى جاقىنداستىرۋ، ورتاق مۇرانى زەردەلەۋ ءۇشىن تاريح پەن ءتىلدى بىرلەسىپ ۇيرەنۋگە دەگەن ىقىلاسىمىزدى بىلدىرەدى»، دەگەن بولاتىن.