22 مامىردا الماتى قالاسىنداعى №58 جالپى ءبىلىم بەرەتىن مەكتەپتە "اكەم – تىرەگىم، انام – جۇرەگىم" فلەشموبى ۇيىمداستىرىلدى، - دەپ حابارلايدى aqshamnews.kz ءتىلشىسى.
ءىس-شارا "باقىتتى بالا – باقىتتى وتباسى" تاقىرىبىندا، قازاقستان بالالارى تۇجىرىمداماسى اياسىندا جانە 1 ماۋسىم – حالىقارالىق بالالاردى قورعاۋ كۇنى قارساڭىندا وتكىزىلدى.
فلەشموبتىڭ باستى ەرەكشەلىگى – وقۋشىلاردىڭ انالارى بىرگە قاتىسىپ، كوڭىلدى ءارى تارتىمدى قيمىلدار ارقىلى ءوزارا بايلانىس پەن سۇيىسپەنشىلىكتى بەينەلەدى. بۇل ءبىر ءسات كوڭىل كوتەرۋ ەمەس، انا مەن بالا اراسىنداعى جىلى قارىم-قاتىناستى نىعايتاتىن، بىر-بىرىنە جاقىنداي تۇسۋگە مۇمكىندىك بەرەتىن اسەرلى كورىنىس بولدى.
فلەشموب بارىسىندا انالار مەن بالالار بىرىگىپ قيمىل جاساپ، ءبىر-بىرىنىڭ كوڭىل-كۇيىن سەزىنە ءبىلدى. جۇزدەرىندەگى شاتتىق، كوزدەرىندەگى شىنايى قۋانىش كوپ نارسەنى اڭعارتتى. بۇل – وتباسىنداعى ماحاببات پەن تۇسىنىستىكتىڭ، جىلىلىق پەن مەيىرىمدىلىكتىڭ ناقتى دالەلى.
"تاربيە وتباسىنان باستالادى. بالانىڭ اتا-اناسىمەن جاقىن قارىم-قاتىناسى – بەرىك وتباسىنىڭ عانا ەمەس، تۇتاس قوعامنىڭ مىقتى ىرگەتاسى. ءبىز بالالاردىڭ باقىتتى بولعانىن، ولاردىڭ جۇزىنەن كۇلكى كەتپەگەنىن قالايمىز. سەبەبى بولاشاق – وسى بالالاردىڭ قولىندا، ال ءبىز سول بولاشاقپەن بىرگە باقىتتىمىز"، - دەدى №58 مەكتەپ ديرەكتورى شىنار ۋتجانوۆا .
وسى مازمۇندى ءىس-شارا ارقىلى مەكتەپ ۇجىمى تەك مەرەكەلىك كوڭىل-كۇي ەمەس، وتباسىلىق قۇندىلىقتاردى ناسيحاتتاۋدىڭ دا جارقىن ۇلگىسىن كورسەتتى.