بەلگىلى جۋرناليست، مەديا جانە سپورت سالاسىنىڭ قايراتكەرى دياس احمەتشارىپ 2025 جىلعى 22 مامىردا ومىردەن ءوتتى. ول 7 مامىردا اقتاۋدا ءىسساپار كەزىندە ينسۋلت الىپ، ميىنا قان قۇيىلىپ، كوماعا تۇسكەن بولاتىن .
دياس احمەتشارىپ ءوزىنىڭ ەڭبەك جولىن 1997 جىلى قازاق راديوسىنىڭ رەپورتەرى رەتىندە باستاعان. ول ۇزاق جىلدار بويى «Qazaqstan» تەلەارناسى مەن «حابار» اگەنتتىگىندە سپورت ءجۋرناليسى قىزمەتىن اتقاردى. قازاقستانداعى العاشقى سپورت ارناسى — «Qazsport» تەلەارناسىنىڭ تۇڭعىش ديرەكتورى بولدى. سونىمەن قاتار، «Insport» تەلەارناسىنىڭ باس رەداكتورى قىزمەتىن اتقاردى .
مەملەكەتتىك قىزمەتتە دە بەلسەندىلىك تانىتىپ، 2003–2007 جىلدارى ق ر سپورت جانە تۋريزم ىستەرى اگەنتتىگىنىڭ باسپا ءسوز قىزمەتىنىڭ باسشىسى، 2010–2012 جىلدارى «استانا-سك» كورپوراتيۆتىك قورىنىڭ قوعاممەن بايلانىس دەپارتامەنتىنىڭ ديرەكتورى، 2012–2013 جىلدارى ق ر سپورت جانە دەنە شىنىقتىرۋ ىستەرى اگەنتتىگى ءتوراعاسىنىڭ كەڭەسشىسى قىزمەتتەرىن اتقاردى. سوڭعى جىلدارى تۋريزم جانە سپورت ءمينيسترىنىڭ قوعاممەن بايلانىس جانە ب ا ق جونىندەگى كەڭەسشىسى بولدى .
دياس احمەتشارىپ وليمپيادا، ازيا ويىندارى جانە الەم چەمپيوناتتارى كەزىندە سپورت شولۋشىسى جانە قازاقستان قۇراماسىنىڭ باسپا ءسوز اتتاشەسى رەتىندە دە قىزمەت ەتتى.
ونىڭ كاسىبي شەبەرلىگى مەن سپورت جۋرناليستيكاسىنا قوسقان ۇلەسى ەل ەسىندە ماڭگى ساقتالادى. مارقۇمنىڭ وتباسى مەن جاقىندارىنا كوڭىل ايتامىز.