باقىتجان سارييەۆ ق ر پرەزيدەنتى كەڭسەسىنىڭ باستىعى بولدى

ق ر پرەزيدەنتى قاسىم-جومارت توقايەۆتىڭ جارلىعىمەن باقىتجان سارييەۆ قازاقستان رەسپۋبليكاسى پرەزيدەنتى كەڭسەسىنىڭ باستىعى بولىپ تاعايىندالدى، دەپ حابارلايدى Almaty-akshamy.kz 
اقوردا سايتىنا سىلتەمە جاساپ.
«باقىتجان ءشومىشباي ۇلى سارييەۆ قازاقستان رەسپۋبليكاسى پرەزيدەنتى كەڭسەسىنىڭ باستىعى بولىپ تاعايىندالسىن، ول قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك قىزمەت جانە كادر ساياساتى ءبولىمىنىڭ مەڭگەرۋشىسى لاۋازىمىنان بوساتىلسىن»، - دەلىنگەن جارلىق ماتىنىندە. 
باقىتجان سارييەۆ 1971 جىلعى 24 جەلتوقساندا الماتى قالاسىندا دۇنيەگە كەلگەن. 
قازاق مەملەكەتتىك ساۋلەت-قۇرىلىس اكادەمياسىن، قازتۇتىنۋ وداعىنىڭ قاراعاندى ەكونوميكالىق ۋنيۆەرسيتەتىن بىتىرگەن، ماماندىعى بويىنشا – ينجەنەر، زاڭگەر. 
1996-1999 جىلدارى قازاقستان رەسپۋبليكاسى پرەمەر-مينيسترى كەڭسەسىنىڭ قۇجاتتامالىق قامتاماسىز ەتۋ ءبولىمىنىڭ مامانى، اعا مامانى، رەفەرەنتى، اعا رەفەرەنتى لاۋازىمدارىندا جۇمىس ىستەدى. 
1999 جىلعى مامىردان 2019 جىلعى ناۋرىزعا دەيىن سىرتقى ساياسات ۆەدومستۆوسى جۇيەسىندە قىزمەت اتقاردى: 
1999-2002 جىلدارى – سىرتقى ىستەر مينيسترلىگىنىڭ اكىمشىلىك دەپارتامەنتى كادر جانە باقىلاۋ باسقارماسىنىڭ باقىلاۋ ءبولىمىنىڭ باستىعى؛ 2002-2003 جىلدارى – سىرتقى ىستەر مينيسترلىگى اپپاراتى كادر باسقارماسىنىڭ باستىعى؛ 
2003-2007 جىلدارى – سىرتقى ىستەر مينيسترلىگىنىڭ اپپارات باسشىسى؛ 
2007-2019 جىلدارى – سىرتقى ىستەر ءمينيسترى كەڭسەسىنىڭ باسشىسى؛ 
2016 جىلعى اقپاننان 2017 جىلعى قازانعا دەيىن سىرتقى ىستەر مينيسترلىگىنىڭ ادەپ جونىندەگى ۋاكىلى مىندەتىن قوسىمشا اتقاردى. 
2019 جىلعى ناۋرىزدا قازاقستان رەسپۋبليكاسى پرەزيدەنتىنىڭ كەڭسەسى باستىعىنىڭ ورىنباسارى لاۋازىمىنا تاعايىندالدى. 
2019 جىلعى شىلدەدە مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك قىزمەت جانە كادر ساياساتى ءبولىمىنىڭ مەڭگەرۋشىسى بولىپ تاعايىندالدى.