بيىلعى وقۋ جىلىندا مەكتەپتەرگە 301 171 وقۋشى باردى.
مەگاپوليس اكىمى باقىتجان ساعىنتايەۆ «الماتى» تا-داعى Akimat LIVE باعدارلاماسىنىڭ تىكەلەي ەفيرى بارىسىندا جاڭا وقۋ جىلىنىڭ باستالۋى جانە كوروناۆيرۋستىق پاندەميا جاعدايىندا وقۋ پروسەسىن ۇيىمداستىرۋ تۋرالى ايتتى، دەپ حابارلايدى Almaty-akshamy.kz.
بيىلعى وقۋ جىلىندا مەكتەپتەرگە 301 171 وقۋشى باردى. مەملەكەتتىك مەكتەپتەردە 280 458 بالالار مەن جاسوسپىرىمدەر ءبىلىم الۋدا، ال جەكەمەنشىك مەكتەپتەردەگى وقۋشى سانى – 20 713. مەملەكەتتىك مەكتەپتەردە ءبىرىنشى سىنىپ وقۋشىلارىنىڭ سانى 3 مىڭعا جۋىق ءوستى. 1-سىنىپتا 30 751 وقۋشى ءبىلىم الۋدا.
وقۋشىلاردىڭ دەنساۋلىعىن ساقتاۋ جانە ءقاۋىپسىز جاعداي جاساۋ ماقساتىندا وقۋ پروسەسى ءبىر مەزگىلدە ءۇش باعىتتا قۇرىلدى. بىرىنشىدەن، وففلاين وقىتۋدا سىنىپتارداعى وقۋشى سانى 25 وقۋشىعا دەيىن بولۋى ءتيىس. بۇل تالاپ ورىندالۋدا. بۇگىندە 45 مەملەكەتتىك مەكتەپتە 104 246 وقۋشى نەمەسە ولاردىڭ 37%-ى ءداستۇرلى فورماتتا وقۋدا. 71 جەكەمەنشىك مەكتەپتەردە 20 650 وقۋشى وففلاين وقۋدا، ياعني 99%-دان اسادى.
ەكىنشىدەن، وقىتۋ ارالاس جۇرگىزىلۋدە، ياعني نەگىزگى پاندەر مەكتەپتە، قالعاندارى قاشىقتان وقىتىلادى. بۇگىندە وقىتۋدىڭ وسى فورماتىمەن162 مەملەكەتتىك مەكتەپتىڭ 154 424 وقۋشىسى نەمەسە 55%-ى قامتىلعان.
ۇشىنشىدەن، 21 788 وقۋشى ونلاين فورماتتا وقيدى، بۇل 8%-دى قۇرايدى. وقىتۋدىڭ بۇل فورماسىمەن نەگىزىنەن ينفەكسيامەن اۋىرعان بالالار، ناۋقاستارمەن بايلانىستا بولعاندار، اۋرۋعا شالدىعۋ ءقاۋپى بار بالالار، سونداي-اق اتا-انالارى مەكتەپ اكىمشىلىگىنە قاشىقتىقتان وقىتۋ تۋرالى جازباشا ءوتىنىش بەرگەن بالالاردى قامتىلعان.
وقۋ جۇكتەمەسىنە جانە وقۋشىلاردىڭ كونتينگەنتىنە بايلانىستى اتا-انالارمەن كەلىسە وتىرىپ، مەكتەپتەردە 5 جانە 6 كۇندىك وقىتۋ ۇيىمداستىرىلعان.
قوعامدىق دەنساۋلىق باسقارماسى جانە سانيتارلىق-ەپيدەميولوگيالىق باقىلاۋ دەپارتامەنتى بىرلەسىپ، مەكتەپتەردەگى جاعدايعا كۇندەلىكتى مونيتورينگ جۇرگىزەدى. ب. ساعىنتايەۆ دەرتتى بالالارعا جۇقتىرماۋ ءۇشىن، اتا-انالاردىڭ بارىنشا ساق بولۋلارى ءتيىس ەكەنىن اتاپ ءوتتى. ول ءۇشىن جاۋاپكەرشىلىكتى جەتە سەزىنۋ جانە ۆاكسينالانۋ قاجەت.