مەملەكەت باسشىسى قاسىم-جومارت توقايەۆقا پارلامەنت سەناتىنىڭ VII سەسسياسى بارىسىندا اتقارىلاتىن جۇمىس جوسپارى تۋرالى باياندالدى.
سونداي-اق پرەزيدەنتتىڭ جولداۋى مەن بەرگەن تاپسىرمالارىن ىسكە اسىرۋعا باعىتتالعان ءبىرقاتار زاڭ توپتاماسىنىڭ ازىرلەنىپ جاتقانى جونىندە مالىمەت بەرىلدى، دەپ حابارلايدى Almaty-akshamy.kz. اkorda.kz-كە سىلتەمە جاساپ.
ق ر پارلامەنتى سەناتىنىڭ ءتوراعاسى الداعى سەسسيادا سەناتورلاردىڭ ۇكىمەتپەن جانە ءماجىلىس دەپۋتاتتارىمەن بىرلەسىپ، ايەلدەر مەن جاستار ءۇشىن 30 پايىزدىق كۆوتانىڭ ساقتالۋىنا قاتىستى زاڭناما بويىنشا جۇمىس ىستەيتىنىن ايتتى. سونىمەن قاتار «الەۋمەتتىك كودەكس»، «ونەركاسىپ ساياساتى تۋرالى»، «كاسىبي بىلىكتىلىك تۋرالى»، «جەكە قوسالقى شارۋاشىلىقتار تۋرالى» جانە باسقا دا زاڭدارعا وزگەرتۋلەر مەن تولىقتىرۋلار ەنگىزۋ مىندەتى تۇر.
ماۋلەن اشىمبايەۆتىڭ ايتۋىنشا، سەناتورلاردىڭ باستاماسىمەن پرەزيدەنت تاپسىرمالارىن ىسكە اسىرۋعا باعىتتالعان ءبىرقاتار زاڭ جوباسى ازىرلەنگەن. اتاپ ايتقاندا، «ادام قۇقىقتارى جونىندەگى ۋاكىل تۋرالى» زاڭ جوباسى جوسپارلانۋدا، سونىمەن قاتار عىلىمي كادرلاردىڭ جاعدايىن جاقسارتۋ جانە ولاردىڭ الەۋمەتتىك قورعالۋ كەپىلدىكتەرى تۋرالى زاڭناماسىنا، سالىق كودەكسىنە وزگەرتۋلەر ەنگىزۋ كوزدەلۋدە. سونداي-اق جايىلىمدىق جەرلەردى باسقارۋدى جانە پايدالانۋدى رەتتەيتىن ءبىرقاتار تۇزەتۋلەر ازىرلەنىپ جاتىر.
قاسىم-جومارت توقايەۆ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا قابىلداناتىن زاڭ جوبالارىن تالقىلاۋ جانە پىسىقتاۋ جۇمىستارىنا ازاماتتىق قوعام وكىلدەرى مەن ساراپشىلاردى كەڭىنەن جۇمىلدىرۋ قاجەتتىگىن ايتتى.
كەزدەسۋ سوڭىندا پرەزيدەنت پارلامەنتتىك ديپلوماتيانىڭ الەۋەتىن ودان ءارى ارتتىرۋعا قاتىستى ءبىرقاتار مىندەت جۇكتەدى.
سونىمەن قاتار مەملەكەت باسشىسى 2022 جىلى وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنە دايىندىقتى باستاۋ تۋرالى تاپسىرما بەردى.