الماتى اكىمى باقىتجان ساعىنتايەۆ جۇمىس ساپارى بارىسىندا ءۇش جول ايرىعىنىڭ قۇرىلىس قارقىنىن، مەتروپوليتەننىڭ ينفراقۇرىلىمىن جانە اباي داڭعىلىن قالا شەكاراسىنا دەيىن تەسۋ جۇمىستارىن تەكسەردى.
مەگاپوليس اكىمى الماتىنىڭ «شىعىس قاقپاسىنداعى»، بۇقتىرما كوشەسى مەن قۇلجا تراكتىسىنىڭ قيىلىسىنداعى جولايرىعىندا بولدى. قۇلجا تراكتى ارقىلى وتەتىن ەستاكادانىڭ ۇزىندىعى – 784 م، بۇقتىرما كوشەسى بويىنداعى تۋننەلدىڭ ۇزىندىعى – 570 م. جىل سوڭىنا دەيىن جەكەلەگەن باعىتتار بويىنشا كولىك قوزعالىسىن اشۋ جوسپارلانۋدا. نىساندى تولىق پايدالانۋعا بەرۋ كەلەسى جىلعا جوسپارلانعان، بۇل بۇقتىرما كوشەسىندەگى كولىك اعىنىن – 30%-عا، قۇلجا تراكتىسىندە وتكىزۋ قابىلەتىن 15%-عا ارتتىرۋعا مۇمكىندىك بەرەدى.
ب. ساعىنتايەۆ سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى تۋننەل تۇرىندەگى جولايرىقتىڭ جۇمىس بارىسىمەن تانىستى. جوبا بويىنشا سەيفۋللين داڭعىلى بويىمەن كولىكتىڭ كەدەرگىسىز قوزعالىسى ءۇشىن جالپى ۇزىندىعى 690 مەتر بولاتىن ەكى تۋننەل سالۋ قاراستىرىلعان. كولىكتەردىڭ ءجۇرۋى جانسۇگىروۆ كوشەسىندەگى، سونداي-اق وزگە كولىك قوزعالىستارى جەردىڭ بەتىمەن وتەدى. ءتورت جەرۇستى جاياۋ جۇرگىنشىلەر وتكەلدەرىن، تروتۋارلاردى سالۋ، اۋماقتى اباتتاندىرۋ جانە كوگالداندىرۋ قاراستىرىلعان.
جوبانى 2022 جىلى اياقتاۋ جوسپارلانعان.
قالا اكىمى رىسقۇلوۆ داڭعىلى مەن ەمسوۆ كوشەسى قيىلىسىنداعى جولايرىعى قۇرىلىسىنىڭ قارقىنىن تەكسەردى. ەستاكادانىڭ ۇزىندىعى 186 م، رىسقۇلوۆ داڭعىلىندا – 8، ال ەمسوۆ كوشەسىنىڭ بويىندا 4 جولاق قاراستىرىلعان.
بۇدان باسقا، ب. ساعىنتايەۆ ارلەۋ جۇمىستارى ءجۇرىپ جاتقان سارىارقا جانە دوستىق بەكەتتەرىندەگى مەتروپوليتەننىڭ ءبىرىنشى جەلىسىنىڭ ەكىنشى كەزەڭىنىڭ ەكىنشى ىسكە قوسۋ كەشەنىنىڭ قۇرىلىس بارىسىمەن تانىستى. ەكى بەكەتتى تەحنيكالىق ىسكە قوسۋ جىل سوڭىنا جوسپارلانعان.
سونداي-اق، الماتى اكىمىنە قالقامان بەكەتىندەگى مەتروپوليتەننىڭ ءبىرىنشى جەلىسىنىڭ ەكىنشى كەزەڭىنىڭ ءۇشىنشى ىسكە قوسۋ كەشەنىن سالۋدىڭ جۇمىس بارىسى تۋرالى باياندالدى. جوبادا دوستىق بەكەتىنەن قالقامان بەكەتىنە دەيىن ۇزىندىعى 2،48 شاقىرىم بولاتىن ءاشىموۆ كوشەسىنەن تومەن سالىناتىن قۋما توننەلدىڭ قۇرىلىسى قاراستىرىلعان.
جۇمىس ساپارى كەزىندە الماتى اكىمى اباي داڭعىلىن قالقامان شاعىن اۋدانىنداعى مومىش ۇلى كوشەسىنەن اۋەزوۆ كوشەسىنە دەيىن ۇڭگىلەۋ جۇمىسىنىڭ بارىسىن تەكسەردى. ونىڭ جالپى ۇزىندىعى 4،8 كم. شۇعىلا شاعىن اۋدانىنداعى ياسساۋي كوشەسىنەن بەرەكە كوشەسىنە دەيىنگى ۋچاسكەنىڭ ۇزىندىعى 3 كم، مۇنداعى جۇمىستار اياقتالىپ قالدى. جوبا بويىنشا 6 جولاقتى جول، تروتۋارلار، ۆەلوجولدار سالۋ قاراستىرىلعان. قۇرىلىس ايماعىندا ورنالاسقان ۋچاسكەلەر ۋاقتىلى ساتىپ الىنسا، وندا جۇمىستى اعىمداعى جىلدىڭ سوڭىنا دەيىن اياقتاۋ جوسپارلانۋدا. وسىنىڭ ارقاسىندا اباي داڭعىلى مومىش ۇلى كوشەسىنەن ناۋرىزباي اۋدانىنىڭ اكىمشىلىك ورتالىعىنا دەيىن ۇزاراتىن بولادى.
ب. ساعىنتايەۆ جولايرىقتارى مەن كوشەلەردى ۇڭگىلەۋدىڭ بارلىق نىساندارى بويىنشا جۇمىس كۇشى مەن تەحنيكانى كەڭىنەن جۇمىلدىرۋدى، جۇمىستىڭ ساپاسى مەن ۋاقتىلى اتقارىلۋىن باقىلاۋدى تاپسىردى. بۇدان وزگە، ءتيىستى ۆەدومستۆولاردىڭ باسشىلارى جوبالاردى ىسكە اسىرۋ كەزىندە تۋىندايتىن ماسەلەلەردى جەدەل شەشۋلەرى قاجەت.