الماتى اكىمى باقىتجان ساعىنتايەۆ ءوزىنىڭ Instagram-داعى پاراقشاسىندا مەكتەپتەردەگى ەپيدەميولوگيالىق احۋالعا تۇراقتى مونيتورينگ جۇرگىزىلەتىنىن ايتتى، دەپ حابارلايدى almaty-akshamy.kz
باقىتجان ساعىنتايەۆ قالاداعى 287 مەكتەپكە 300 مىڭعا جۋىق بالانىڭ بارعانىن ەسكە سالدى.
«ءقاۋىپتى ىندەتتىڭ ەكىنشى جىلعا سوزىلۋىنا قاراماستان، وقۋ جىلىن وففلاين فورماتتا باستايمىز. 45 مىڭنان اسا ءمۇعالىم مەن تەحنيكالىق قىزمەتكەر ۆاكسينالاۋدان ءوتتى. مەكتەپتەر بارلىق كارانتيندىك شەكتەۋ تالاپتارى ەسكەرىلە وتىرىپ دايىندالدى. سانيتارلىق-ەپيدەميولوگيالىق قاۋىپسىزدىك شارالارىنىڭ ساقتالۋى مەن سىنىپتاعى جاعداي تۇراقتى باقىلاۋدا بولادى»، - دەپ اتاپ ءوتتى باقىتجان ساعىنتايەۆ.
باقىتجان ساعىنتايەۆ وقۋشىلارعا وقۋدا ساتتىلىك، مۇعالىمدەر مەن اتا-انالارعا شىدامدىلىق پەن تاباندىلىق تىلەدى.
«30 مىڭ ءبىرىنشى سىنىپ وقۋشىلارى العاش رەت مەكتەپ تابالدىرىعىن اتتادى. جاڭا وقۋ جىلى بارلىعىڭىز ءۇشىن ءساتتى جانە قۋانىشتى بولسىن!» - دەپ جازدى مەگاپوليس اكىمى.
