قازاقستان تاۋەلسىزدىگىنە - 30 جىل
شۆەيساريانىڭ جەنيەۆا قالاسىندا قازاقستان تاۋەلسىزدىگىنىڭ 30 جىلدىعىن مەرەكەلەۋ اياسىندا «قازاقستان – بۇۇ: بەيبىتشىلىك ءۇشىن سەرىكتەستىك» حالىقارالىق كونفەرەنسياسى وتكىزىلدى، دەپ حابارلايدى almaty-akshamy.kz.
كونفەرەنسيا سەمەي يادرولىق پوليگونىنىڭ جابىلۋىنىڭ 30 جىلدىعى مەن 29 تامىز - يادرولىق سىناقتارعا قارسى حالىقارالىق كۇرەس كۇنىنە وراي ۇيىمداستىرىلدى.
وعان قازاقستاندىق جانە شەتەلدىك ساياساتكەرلەر، يادرولىق قارۋسىزدانۋ سالاسىنداعى ساراپشىلار، ديپلوماتيالىق وكىلدىكتەر مەن ميسسيالاردىڭ وكىلدەرى قاتىستى.
ەلباسى كىتاپحاناسىنىڭ ديرەكتورى باقىتجان تەمىربولات ءوز بايانداماسىندا مەملەكەتىمىز «يادرولىق كلۋب» مۇشەلىگىنەن ابىرويمەن باس تارتقانىن اتاپ ءوتتى.
«قازاقستان يادرولىق قارۋدى تاراتپاۋ مەن قارۋسىزدانۋ ماسەلەلەرىندەگى اشىقتىق ۇلگىسىن الەمگە ءىس جۇزىندە كورسەتتى. بۇل اشىقتىقتى ول سىرتقى ساياسات ىرگەتاسىنىڭ ءبىر كىرپىشىنە اينالدىردى. ناتيجەسىندە ەلىمىز يادرولىق قارۋدى تاراتپاۋ جانە اتوم ەنەرگياسىن بەيبىت ماقساتتا قولدانۋ سالاسىنداعى بارلىق ىرگەلى حالىقارالىق شارتتارعا قاتىسۋشى اتاندى. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ نۇرسۇلتان نازاربايەۆتىڭ يادرولىق قارۋعا قارسى باستامالارىن ىلگەرىلەتىپ، حالىقارالىق قاۋىپسىزدىكتى نىعايتۋ جونىندەگى ساياساتتى جالعاستىرۋدا. مەملەكەت باسشىسى 2019 جىلدىڭ قىركۇيەگىندە وتكەن بۇۇ باس اسسامبلەياسىنىڭ 74-سەسسياسىندا الەمدى يادرولىق قارۋدان ازات ەتۋ قازاقستان ءۇشىن نەگىزگى مىندەتتەردىڭ ءبىرى ەكەنىن اتاپ وتكەن بولاتىن»،- دەدى ول.
1949 جىلدان 1989 جىلعا دەيىن سەمەي پوليگونىندا جۇرگىزىلگەن جارىلىستىڭ سانى – 456. بۇل كورسەتكىش الەم بويىنشا جۇرگىزىلگەن يادرولىق سىناقتاردىڭ 25%-ىن قۇرايدى. رادياسيانىڭ اسەرىنەن 1،5 ميلليوننان استام ادام زارداپ شەكتى. شارۋاشىلىق اينالىمىنان 300 مىڭ شارشى كيلومەتردەن استام جەر شىعارىلدى.
كونفەرەنسيا بارىسىندا ۇلتتىق يادرولىق ورتالىقتىڭ باس ديرەكتورى ەرلان باتىربەكوۆ، يادرولىق قارۋعا تىيىم سالۋ جونىندەگى حالىقارالىق كامپانيانىڭ ديرەكتورى بەاتريس فين، بۇۇ-نىڭ قارۋسىزدانۋ ماسەلەلەرىن زەرتتەۋ جونىندەگى ينستيتۋت ديرەكتورى روبين گايسس بايانداما وقىدى.