الماتى — وڭىردەگى يننوۆاسيالىق تەحنولوگيالاردىڭ ورتالىعى، مۇندا ەلدەگى بارلىق ستۋدەنتتەردىڭ 40%-ى وقيدى.
قالادا ۇزدىك جوو-نىڭ 30%-دان استامى، 2622 ءىT-كومپانيا (ق ر 40%-ى) ورنالاسقان،ەلەكتروندى ساۋدا كولەمى 551 ملرد تەڭگەگە جەتۋدە. ەلىمىزدىڭ ءاربىر ەكىنشى يننوۆاسيالىق تەحنولوگيا مامانى الماتىدا تۇرادى جانە قالالىقتاردىڭ 95%-ى ونلاين-سەرۆيستەردى پايدالانادى.
الماتى قالاسىنىڭ اكىمى باقىتجان ساعىنتايەۆ «الماتى» تا-داعى كەزەكتى تىكەلەي ەفير بارىسىندا «الماتى-2050» ستراتەگياسىن سيفرلاندىرۋ باعىتتارىن دامىتۋ تۋرالى ايتتى، دەپ حابارلادى Almaty-akshamy.kz.
قالا اكىمىنىڭ ايتۋىنشا، مەگاپوليستى ءتيىمدى باسقارۋ سيفرلاندىرۋ تەتىكتەرىنسىز مۇمكىن ەمەس. الماتىدا 2 ملن جۋىق ادام تۇرادى، ال الماتى اگلومەراسياسى شەكاراسىندا – 3 ملن. قالادا شوب 287 مىڭ كاسىپورنى بار. كولىك ينفراقۇرىلىمىنا 3 مىڭ شاقىرىمنان استام جول كىرەدى. كۇن سايىن قالادا 675 مىڭعا جۋىق كولىك جۇرەدى. 165 مىڭ جارىق باعانالارى ورناتىلدى.
قالادا دەنساۋلىق ساقتاۋدىڭ كوپدەڭگەيلى جۇيەسى بار. جىل سايىن قالانىڭ العاشقى مەديسينالىق-سانيتارلىق كومەك كورسەتەتىن ۇيىمدارىنا 11،5 ملن ادام كەلەدى.
قالا ەلدىڭ ءىرى ءبىلىم ورتالىعى بولىپ تابىلادى، مۇندا ءبىلىم بەرۋ مەكەمەلەرىنىڭ دامىعان جەلىسى بار. قالا مەكتەپتەرىندە 288 مىڭ وقۋشى وقيدى.
«ءبىز ءقازىردىڭ وزىندە وڭىردەگى جەتەكشى قالالاردىڭ بىرىنە اينالدىق، دەگەنمەن، قالانىڭ الەمدىك كارتادا نەگىزى كوشباسشىلىق پوزيسيانى ۇستانۋى ءۇشىن بىزدە بارلىق جاعداي جاسالعان»، — دەپ اتاپ ءوتتى باقىتجان ساعىنتايەۆ.
Smart city نەمەسە «اقىلدى قالا» باستاماسى اياسىندا قالالىق رەسۋرستار مەن قىزمەتتەردى باسقارۋدى جەتىلدىرۋ بويىنشا جۇمىس جۇرۋدە. ونىڭ ۇستىنە، قالانىڭ نەگىزگى اكتيۆتەرى ازاماتتار، پروسەستەر مەن تەحنولوگيالار بولىپ تابىلادى. ءبىرىنشى كەزەكتە زياتكەرلىك مودەرنيزاسيالاۋدى قاجەت ەتەتىن سالالار — مەملەكەتتىك باسقارۋ، قالانىڭ ينفراقۇرىلىمى، الەۋمەتتىك ورتا جانە ەكونوميكا.