الماتىدا «قوعامدىق پىكىر» قوعامدىق قورىنىڭ ۇيىمداستىرۋىمەن باسپا ءسوز كونفەرەنسياسى ءوتتى. وندا ۇيىم مۇشەلەرى ەل ازاماتتارىن سايلاۋدا بەلسەندىلىك تانىتىپ، باقىلاۋشى بولۋعا شاقىردى.
«19 ناۋرىز كۇنى ءماجىلىس جانە ءماسليحات دەپۋتاتتارىن سايلاۋ وتەدى. بۇل - ءبىزدىڭ ەلىمىز ءۇشىن ۇلكەن ساياسي ناۋقان. وندا ارنايى اككرەديتاسيادان وتكەن، 18 جاسقا تولعان قازاقستان ازاماتتارى باقىلاۋشى بولا الادى. وسىعان وراي، «قوعامدىق پىكىر» قوعامدىق قورى ءوز جۇمىسىن باستايدى. ءبىز قوعامعا ءوز ۇلەسىن قوسقىسى كەلەتىن ازاماتتارىمىزدى ءبىزدىڭ ۇيىمنىڭ دايىندىعىنان ءوتىپ، باقىلاۋشى بولۋعا شاقىرامىز. ءبىزدىڭ باستى مىندەتىمىز – سايلاۋدىڭ ءادىل ءوتۋى. سوندىقتان باقىلاۋشىلار داۋىس بەرىپ جاتقان بيۋللەتەندەردىڭ سانىنا، ساپاسىنا دۇرىستاپ قاراعانى ءجون دەپ ويلايمىن»، – دەدى «قوعامدىق پىكىر» ۇيىمىنىڭ مۇشەسى، PhD مامانى ءاشىرالى سمانوۆ.
«قوعامدىق پىكىر» قوعامدىق قورىنىڭ تاعى ءبىر مۇشەسى ءارى جاس ۇستاز ديانا مالايەۆا باقىلاۋشىلاردى ارنايى دايىنداۋ ارقىلى جاستار اراسىندا ساياسي-قۇقىقتىق مادەنيەت قالىپتاستىرۋدى ماقسات ەتەتىندەرىن ايتتى.
«ءبىزدىڭ ۇيىم وتكەن سايلاۋدا باقىلاۋشىلاردى دايىنداپ، ءبىراز تاجىريبە الدى. بۇل تاجىريبەنى الداعى سايلاۋدا دا ءتيىمدى پايدالانۋعا نيەتتىمىز. ءبىزدىڭ ۇيىمعا جۇگىنگەن باقىلاۋشى بولۋعا نيەتتى ادامداردى بارلىق قاجەتتى ەرەجە-تالاپتارمەن تانىستىرامىز. نەگىزگى ماقساتىمىز – جاستار اراسىندا قۇقىقتىق مادەنيەت قالىپتاستىرۋ. ولار وزدەرىنىڭ مىندەتتەرىن، زاڭدى قۇقىقتارىن ءبىلۋى قاجەت. الداعى سايلاۋدا باقىلاۋشى بولۋ – جاستارعا تاپتىرماس ساياسي تاجىريبە»، – دەدى ول.