بۇگىن جوباعا قاتىسۋعا ءوتىنىم قابىلداۋ باستالىپ، 10 كۇنگە سوزىلادى. گرانت الۋعا باستى ۇمىتكەرلەر – جۇمىسسىز ازاماتتار مەن جەكە كاسىپكەرلەر
كاسىپكەرلىك نەگىزدەرىن وقۋ بويىنشا جوبانى ق ر ەڭبەك جانە حالىقتى الەۋمەتتىك قورعاۋ مينيسترلىگى جانىنداعى وڭىرلىك جۇمىسپەن قامتۋ ورتالىقتارى ىسكە اسىرىپ جاتىر، دەپ حابارلايدى Almaty-akshamy.kz.
الماتى وكپ شاعىن جانە ميكروبيزنەستە بىلىكتىلىكتى دامىتۋ جونىندەگى جەتەكشى ساراپشى ابزال ءومىرباي گرانت قاجەتتى جابدىق، ەڭبەك قۇرالدارى، تەحنولوگيالىق جابدىق، جانۋارلار، ءتورت تۇلىك، قۇس، اعاش كوشەتى، بۇتالى وسىمدىكتەر، تۇقىم، كوشەت ساتىپ الۋ، جاڭا بيزنەس يدەيالاردى ىسكە اسىرۋعا قاجەت ورىنجايدى جالعا الۋعا بەرىلەتىنىن ايتتى.
«گرانتتار كاسىپ باستاۋعا بەرىلەدى. نەسيە تولەۋ، تۇرعىن ءۇي، جەر ۋچاسكەسىن ساتىپ الۋ سىندى تۇتىنۋشىلىق ماقساتتار قاراستىرىلمايدى. كەڭەس الۋ ءۇشىن وكپ كاسىپكەرلەرگە قىزمەت كورسەتۋ ورتالىعىنا كەلۋگە بولادى»، – دەدى ابزال ءومىرباي.
جەكە كاسىپكەر مەرۋەرت بايلەنوۆا - «باستاۋ بيزنەس» جوباسىنىڭ تۇلەگى. ماماندىعى بويىنشا پەداگوگ بالالارعا قوسىمشا ساباق بەرۋ، ساۋات اشۋ سالاسىندا بيزنەسىن جۇرگىزىپ جاتىر.
«باستاۋ بيزنەس» گرانتىن بىلتىر 2022 جىلى ۇتىپ الدىم. پورتال وتە قولايلى جاسالعان. قاراپايىم، جۇيەلى تۇردە رەت-رەتىمەن تۇسىنىكتى جاسالعان. بيزنەس جوبامدى ءوزىم جازدىم، ەش قيىندىق بولمادى. نەگىزى 2021 جىلى جازعام. ول جىلى گرانت ۇتا المادىم. ءار بارعان سايىن قويعان سۇراقتارىنا، ايتقان ەسكەرتۋلەرىنە قاراي تولىقتىرىپ وتىردىم. سوڭىندا قانداي سۇراق قويسا دا جاۋابىم دايىن تۇردى. ءسويتىپ، 1 225 200 تەڭگە گرانت ۇتىپ الدىم. ءقازىر بيزنەسىمدى كەڭەيتتىم، تابىسىم دا كوبەيدى. گرانت ۇتامىن دەگەنشە قانشاما كاسىپكەرلەرمەن ارالاستىم، ويىم وزگەردى، تاجىريبە جينادىم. كاسىپ باستاۋ وپ-وڭاي، تابىستى بولاتىنداي جۇرگىزىپ كەتۋ ءۇشىن ءبىراز كەڭەس كەرەك. ءبىرىنشى قيىندىقتى سىنىپ قالماۋ قاجەت»، – دەپ پىكىرىن ءبولىستى شاعىن كاسىپكەر مەرۋەرت بايلەنوۆا.
كاسىپكەر ءوتىنىم قالاي تاپسىرۋ، بيزنەس-جوسپاردى قۇرۋ، سونداي-اق باعدارلامالار جايىندا اقپاراتتى وڭىرلىك كاسىپكەرلەر پالاتاسىنان اقپارات الاتىنىن ايتتى.
«ءبىر جوباعا قاتىسىپ، كاسىپ جۇرگىزۋدى ۇيرەنۋ سونىمەن قاتار كاسىپ باستاۋعا گرانت الۋعا بولادى. بۇل جاقسى مۇمكىندىك. ءوتىنىم بەرۋگە ون كۇن بەرىلگەن. سونىمەن قاتار جوبا بويىنشا بۇرىن وقۋعا قاتىسقان ازاماتتار قولىنداعى مەرزىمى ءۇش جىلدان اسپاعان سەرتفيكاتىمەن گرانت الۋعا ءوتىنىم بەرە الادى»، – دەدى الماتى قالاسى كاسىپكەرلەر پالاتاسىنىڭ ءتوراعاسى اۋەز تايىمبەتوۆ.
بيىل «باستاۋ بيزنەس» جوباسى بويىنشا ءتورت لەك قاراستىرىلعان.