سەبەبى ازىرگە بەلگىسىز.
بەلگىلى بوكسشى، افينى وليمپياداسىنىڭ چەمپيونى، ۆەل باركەر كۋبوگىنىڭ يەگەرى باقتيار ارتايەۆ ق ر بوكس فەدەراسياسىنىڭ ۆيسە-پرەزيدەنتى جانە مەملەكەتتىك جاتتىقتىرۋشى قىزمەتىنەن كەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل مالىمەتتى سپورتشىنىڭ ءوزى قازاقپارات تىلشىسىنە راستادى.
«قىزمەتتەن كەتىپ جاتقانىمدى راستايمىن. ءبىراق سەبەبى تۋرالى ازىرگە ەشتەڭە ايتا المايمىن»، - دەپ قىسقا قايىردى سپورت مەنەدجەرى.
باقتيار ارتايەۆ 1983 جىلى 14 ناۋرىزدا تاراز قالاسىندا تۋعان. بوكسپەن 10 جاسىنان باستاپ اينالىستى.
2004 جىلى گرەكيادا وتكەن وليمپيادا ويىندارىنىڭ شيرەك فينالىندا ەكى دۇركىن وليمپيادا چەمپيونى رەسەيلىك ولەگ سايتوۆتى جەڭدى.
ال فينالدا ارتايەۆ كۋبانىڭ ەكى دۇركىن الەم چەمپيونى لورەنسو اراگوننان باسىم بولىپ، «التىننان» القا تاقتى.
«بارىس» وردەنىمەن ماراپاتتالعان.
سوڭعى ءبىر جارىم جىل قازاقستان بوكس قۇراماسىنىڭ مەملەكەتتىك جاتتىقتىرۋشىسى قىزمەتىن اتقارىپ كەلدى.