ەگىس القاپتارى 1،4 مىڭ گەكتارعا ۇلعايادى.
الماتى وبلىسىنداعى ماماندار كوكتەمگى ەگىس جۇمىستارىنا دايىندىق جۇرگىزىپ جاتىر. ۇستىمىزدەگى جىلى الماتى وبلىسىنداعى شارۋالاردىڭ ەگىس القاپتارى 973،6 مىڭ گەكتار بولماق. بۇل وتكەن جىلمەن سالىستىرعاندا 1،4 مىڭ گەكتارعا ۇلعايادى دەگەن ءسوز، دەپ حابارلادى Almaty-akshamy.kz.
مامانداردىڭ ايتۋىنشا، مينەرالدى تىڭايتقىشتارعا بيىل جەرگىلىكتى بيۋدجەتتەن 2 ملرد تەڭگەدەن استام سۋبسيديا بولىنگەن، 43،7 مىڭ توننا تىڭايتقىشتى قولدانۋ جوسپارلانۋدا.
«دەگەنمەن تىڭايتقىش باعاسىنىڭ ەكى ەسەگە ءوسىپ كەتكەنى شارۋاشىلىقتارعا قيىندىق تۋعىزۋدا. جاۋىن-شاشىننىڭ، قاردىڭ ازدىعى بيىل دا ديحاندارعا اۋىرتپاشىلىق سالماق. «قازگيدرومەتتىڭ» بولجامىندا وبلىستا ىلعال جيناقتاۋ كەزەڭىندە جاۋىن-شاشىن ورتا ەسەپپەن 16-38%-عا ازايعان، ال وبلىس تاۋلارىندا قار قورى ورتاشا العاندا 24-47%-عا از.وبلىستاعى سۋارۋ جەلىلەرى مەن گيدروتەحنيكالىق قۇرىلىستاردىڭ توزۋىنان كانالدارداعى سۋ شىعىنى دا ارتىپ كەلەدى. بۇل ماسەلەنى شەشۋ ءۇشىن وبلىستىڭ 16 اۋدانىنداعى 113،8 مىڭ گەكتار سۋارمالى جەردى قالپىنا كەلتىرۋ ءۇشىن سۋارۋ جەلىلەرىن رەكونسترۋكسيالاۋ جۇمىستارى جۇرگىزىلۋدە»، - دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
وسى ماقساتتا جوبالىق سمەتالىق قۇجاتتاما ازىرلەۋگە جەرگىلىكتى بيۋدجەتتەن 3،4 ملرد تەڭگە ءبولىندى.
قازىرگى ۋاقىتتا قۇرىلىس-مونتاج جۇمىستارى اقسۋ، ەسكەلدى، قاراساي اۋداندارىندا جانە تالدىقورعان قالاسىندا، قوسىمشا يسلام دامۋ بانكىنىڭ قاراجاتىمەن 2 اۋداندا جۇرگىزىلۋدە.
وبلىس اكىمى قانات بوزىمبايەۆ سۋ قورىن ۇنەمدى ءتيىمدى پايدالانۋ ءۇشىن اگرارلىق شارۋاشىلىقتار ىلعال ساقتاۋ تەحنولوگياسىنا كوشۋى ءتيىس ەكەنىن ايتتى. جالپى وبلىستا 20،7 مىڭ گەكتاردان استام جەرگە تامشىلاتىپ جانە جاڭبىرلاتىپ سۋارۋ قوندىرعىلارى ورناتىلعان، ياعني وڭىردە رەسۋرستىق تەحنولوگيانى قولدانۋ دەڭگەيى 4،7% عانا.
«كوكتەمگى دالا جۇمىستارىنا دايىندىق - بارلىق اۋدان، قالا اكىمدەرىنىڭ الدىندا تۇرعان نەگىزگى مىندەتتىڭ ءبىرى. بۇگىنگى ايتىلعان سۋارۋ جۇيەلەرىن قايتا جاڭعىرتۋ، سۋ قويمالارىن سالۋ، سۋ ءتاريفىن، مينەرالدى تىڭايتقىشتار مەن جانار-جاعار ماي باعاسىن رەتتەۋ، اۋىل شارۋاشىلىعى تەحنيكالارىن جاڭارتۋ سياقتى ماسەلەلەردى ءبىر-اق كۇندە شەشۋ مۇمكىن ەمەس. ءبىراق ناقتى جوسپار جاساپ، كەزەڭ-كەزەڭىمەن قارجىلاندىرا وتىرىپ شەشۋگە بولادى. وسى ورايدا ەگىس القاپتارىندا سۋدى ۇنەمدەۋ جانە ىلعال ساقتاۋ تەحنولوگيالارىن ەنگىزۋ جۇمىستارىنا ەرەكشە ءمان بەرۋ كەرەك. كەپىلدەندىرىلگەن ديزەل وتىنىن جەتكىزۋدىڭ بەكىتىلگەن كەستەسىنە سايكەس جانار-جاعارمايدى ۋاقىتىلى جەتكىزۋدى جانە ماشينا-تراكتور پاركىن جاڭارتۋ ماسەلەلەرىن باقىلاۋعا الۋدى تاپسىرامىن. كوكتەمگى دالا جۇمىستارىن ۋاقىتىلى جۇرگىزۋ ءۇشىن نەسيە بەرۋ جانداندىرىلىپ، قاراجاتتىڭ يگەرىلۋى قامتاماسىز ەتىلسىن. سۋارمالى سۋدى ۋاقتىلى بەرۋ ءۇشىن سۋارۋ ارنالارى مەن سۋ شارۋاشىلىعى قۇرىلىستارىن دايىنداۋ شارالارى قابىلدانسىن. بۇل جۇمىستار جوعارى ءونىم الۋعا ىقپال ەتەدى دەپ سانايمىن»، - دەدى قانات بوزىمبايەۆ سەلەكتورلىق كەڭەستە.