مەملەكەت باسشىسى قارجى نارىعىنداعى قازىرگى جاعداي تۋرالى ايتتى، دەپ حابارلايدى Almaty-akshamy.kz.
«مۇنداي احۋال ۇكىمەتتى تىكەلەي قارجىلاندىرۋمەن، كەپىلدىك جانە سۋبسيديا بەرۋمەن اينالىسۋعا ماجبۇرلەيدى. بۇل ءتاسىل ءتيىمسىز، كوپ قاراجاتتى تالاپ ەتەدى ءارى نارىقتىق ەكونوميكا قاعيدالارىنا قايشى كەلەدى. سونىمەن بىرگە، ناقتى سەكتورعا بەرىلەتىن كرەديت ازايىپ جاتقاندا بانكتەر تۇتىنۋ نەسيەسىمەن اۋەستەنىپ كەتتى. وسى جاعداي قارجى جۇيەسىنە تونەتىن سىن-قاتەرلەردىڭ كوبەيۋىنە جانە ازاماتتاردىڭ شەكتەن تىس قارىزعا باتۋىنا اكەپ سوقتىردى»، - دەدى قاسىم-جومارت توقايەۆ قازاقستان حالقىنا جولداۋىندا.
مەملەكەت باسشىسى مالىمدەگەندەي، 2019 جىلى 500 مىڭ ازاماتتىڭ كەپىلسىز نەسيەسىن كەشىرۋ تۋرالى شەشىم جانە جاقىندا قابىلدانعان جەكە تۇلعالاردىڭ بانكروتتىعى تۋرالى زاڭ ماسەلەنى ءبىرشاما رەتتەدى.
پرەزيدەنتتىڭ ايتۋىنشا، احۋالدى ءبىرجولا تۇزەۋ ءۇشىن جاڭادان جۇيەلى شارالار قابىلداۋ قاجەت.
«ازاماتتاردىڭ قارجى ساۋاتىن ارتتىرۋ وتە ماڭىزدى. بۇل رەتتە «Amanat» پارتياسىنىڭ «قارىزسىز قوعام» جوباسىن ەرەكشە اتاپ ءوتۋ قاجەت. سونىڭ ارقاسىندا ەلىمىزدىڭ 8 ايماعىندا 20 مىڭنان استام ادام قارجىلىق ساۋاتىن ارتتىردى. ولاردىڭ كوپشىلىگى – 10 جانە ودان دا كوپ نەسيە العان ادامدار. بۇل جوبا از ۋاقىتتا ءوزىنىڭ تيىمدىلىگىن كورسەتتى. ۇكىمەتكە «Amanat» پارتياسىمەن بىرلەسىپ، ونىڭ اۋقىمىن كەڭەيتۋدى تاپسىرامىن. «قارىزسىز قوعام» جوباسىنىڭ يگىلىگىن بۇكىل ەلىمىز كورۋى قاجەت»، - دەيدى ول.