بانكروتتىققا ءوتىنىش بەرەردە وتباسى مۇشەلەرىنىڭ مۇلكى تەكسەرىلەدى

بۇل تۋرالى قارجى ۆيسە-مينيسترى ەرجان ءبىرجانوۆ مالىمدەدى.

وكىلەتتى ورگاندار بانكروتتىققا ءوتىنىش بەرگەن ازاماتتىڭ وتباسى مۇشەلەرىنىڭ دە جەكە مۇلكى مەن تابىسىن تەكسەرەدى، دەپ حابارلايدى Almaty-akshamy.kz

«بانكروتتىق پروسەدۋرا كەزىندە ءبىز ازاماتتىڭ مۇلكى، وتباسىنىڭ مۇلكى نەمەسە قارىزى، باسقا دا اكتيۆتەرى بويىنشا بارلىق ماعلۇماتتى جينايمىز. ەگەر دە بانكروتتىق كەزىندە جالعان اقپارات ۇسىنعانى نەمەسە ءوز مۇلكىن وتباسى مۇشەسىنە اۋدارعانى انىقتالسا، الگى ازامات بۇل پروسەدۋرادان وتپەيدى. سوندىقتان ءبىز بانكروتتىققا ادەيى ءوتىنىش بەرۋ پروسەدۋراسىن توقتاتۋ ءۇشىن بارلىق اقپاراتتى جينايمىز»، - دەدى ەرجان ءبىرجانوۆ.

"مىسالى، ايەلىنىڭ اۆتوكولىگى بار دەلىك، ەگەر كۇيەۋى بانكروتتىققا تاپسىرسا، ورتاق مۇلىككە نە بولادى؟" دەگەن سۇراققا:

«وتە دۇرىس ايتاسىز. ەگەر نەكەلەسكەننەن كەيىن ەرلى-زايىپتىنىڭ ورتاق مۇلكى بولسا، بۇل مۇلىك بانكروتتىق پروسەدۋراسى كەزىندە ءوتىنىش بەرۋشىنىڭ قوسىمشا اكتيۆى رەتىندە سانالادى، تەكسەرىلەدى. مىسالى، اۆتوكولىكتەن باسقا جەكەمەنشىك پاتەرى نەمەسە ۇلەسى بولسا، ول قارىزىن تولەۋگە مۇمكىندىگى بار ازامات رەتىندە قاراستىرىلادى. بانكروتتىققا وتكىزىلمەيدى»، - دەپ ءتۇسىندىردى ۆيسە-مينيستر.

بانكروتتىققا ءوتىنىش بەرۋ 3 ناۋرىزدا باستالادى.