تەڭگە وتكەن ايدا 4،6%-عا نىعايدى.
ءساۋىر ايىندا جاھاندىق قارجى نارىعىنداعى بەلگىسىزدىك پەن قۇبىلمالىلىققا قاراماستان، 1 دوللاردىڭ قۇنى 445،62 تەڭگەگە دەيىن نەمەسە 4،6% نىعايدى، دەپ حابارلايدى Almaty-akshamy.kz.
«ءساۋىر ايىندا شەتەل ۆاليۋتاسىنا سۇرانىستىڭ ايتارلىقتاي تومەندەگەنى بايقالدى. قازاقستان قور بيرجاسىنداعى ساۋدا-ساتتىقتىڭ جالپى كولەمى 1،9 ملرد اقش دوللارى بولعان كەزدە ساۋدا-ساتتىقتىڭ ورتاشا كۇندىك كولەمى 179 ملن اقش دوللارىنان 92 ملن اقش دوللارىنا دەيىن تومەندەدى. ۆاليۋتا نارىعىنا كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى قولداۋ كورسەتتى، ولار ىشكى ۆاليۋتا نارىعىندا شامامەن 253،2 ملن اقش دوللارى بولدى. ءساۋىر ايىندا ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتا ساتۋ 168،3 ملن اقش دوللارىن قۇرادى. ۇلتتىق قوردان ساتۋ ۇلەسى - ساۋدا-ساتتىقتىڭ جالپى كولەمىنىڭ 8،7 پايىزى»، - دەلىنگەن ۇلتتىق بانكتىڭ رەسمي حابارلاماسىندا.
ىشكى ۆاليۋتا نارىعىندا احۋالدىڭ تۇراقتانۋى اياسىندا ۇلتتىق بانك ساۋىردە ۆاليۋتالىق ينتەرۆەنسيالاردى، سونداي-اق بجزق زەينەتاقى اكتيۆتەرى مەن سەنىمگەرلىك باسقارۋداعى باسقا دا قورلار ءۇشىن شەتەل ۆاليۋتاسىن ساتىپ الۋ نەمەسە ساتۋ وپەراسيالارىن جۇرگىزگەن جوق.
قىسقا مەرزىمدى پەرسپەكتيۆادا تەڭگەنىڭ قۇبىلمالىلىعى گەوساياسي جاعدايدىڭ وزگەرۋىنە، ىشكى قاتىسۋشىلاردىڭ كۇتۋلەرىنە جانە الەمدىك نارىقتارداعى احۋالعا بايلانىستى بولادى.
ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانۋدى جالعاستىرادى.