ەلىمىزدە ءساۋىر ايىندا دۇنيەگە كەلگەن ۇلدارعا رامازان، ال قىزدارعا مەدينا ەسىمى ەڭ كوپ قويىلعان.
بۇل دەرەكتى ق ر ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اتاپ ايتقاندا، رامازان ەسىمدى 1085 ۇل دۇنيەگە كەلدى. ەكىنشى ورىندا سۇرانىسقا يە بولعان ەسىم - ايسۇلتان. بۇل ات 248 ۇلعا قويىلدى. تانىمال ۇشتىككە 174 ادامنىڭ تاڭداۋىمەن ءاليحان ەسىمى ەنىپ تۇر.
ايتا كەتسەك، ناۋرىز ايىندا بۇل ەڭ كوپ قويىلعان (284) ات بولاتىن. سونداي-اق، ساۋىردە 141 قازاقستاندىق بالاسىنا نۇريسلام ەسىمىن بەرىپتى. بۇل ەسىم ناۋرىز ايىندا دا 4-ورىندا بولعان.
ول كەزدە 191 بالا وسى ەسىممەن قازاقستان ازاماتى اتاندى. ال، قىزدارعا ەڭ كوپ قويىلعان ەسىم - مەدينا. ساۋىردە 430 اتا-انا وسى اتتى تاڭداپتى. ەكىنشى ورىندا - رايانا، بۇل ەسىم 383 رەت قويىلعان. 343 قىزعا بەرىلگەن ايشا ەسىمى كەڭ تارالعان ساناتتاعى ۇشتىككە ەنىپ وتىر.
جالپى، وتكەن ايداعى ستاتيستيكا نارەستەلەرگە نەگىزىنەن مۇسىلمانشا ەسىمدەردىڭ ءجيى قويىلعانىن كورسەتەدى. ايتالىق، الي، يسلام، مۋحامماد، مۋسليم، دىنمۇحاممەد، امينا، ياسينا، فاتيما سياقتى باسقا دا اتتار كەڭ تارالعان. ەسكە سالا كەتسەك، بيىلعى ءبىرىنشى توقساندا ءمامس جۇيەسى شەڭبەرىندە ەكستراكورپورالدىق ۇرىقتاندىرۋدىڭ 835 ءراسىمى ورىندالدى.