كۇنتىزبەمىزگە العىس ايتۋ كۇنىنىڭ ەنگىزىلگەنىنە بيىل سەگىزىنشى جىل. بۇل – سان ءتۇرلى سىناقتان وتكەن حالقىمىزدىڭ ىنتىماق-بىرلىگىن ايقىنداي تۇسەتىن ەرەكشە كۇن. تاعدىردىڭ تالكەگىمەن ەلىمىزگە قونىس اۋدارعان ءتۇرلى ەتنوس وكىلدەرىن قۇشاعى كەڭ قازاق ەلى سول ءبىر زامانداردا ىستىق باۋىرىنا تارتا ءبىلدى.
كەيىنگى ۋاقىتتا قازاقشا سويلەيتىن وزگە ۇلت وكىلدەرىنىڭ كوبەيگەنى دە زاڭدىلىق. سونداي-اق، ەلىمىزدىڭ اسكەري قۇرىلىمىندا دا، اسكەر قاتارىنا شاقىرىلاتىن جاس ساربازدار اراسىندا دا قازاق ءتىلىن جەتىك مەڭگەرگەن وزگە ۇلت وكىلدەرى جىل ساناپ ارتىپ كەلەدى. سولاردىڭ ءبىرى – 5571 اسكەري ءبولىمىنىڭ ماتەريالدىق جانە تەحنيكالىق قامتاماسىز ەتۋ روتاسىنىڭ ساربازى بانادر يسايەۆ.
بانادر ناعىز قازاقى ءوڭىر – شىمكەنتتە دۇنيەگە كەلگەن. ۇلتى – ءازىربايجان. كورشى بالالاردىڭ ءبارى قازاق بولعاندىقتان، ويىن كورىگىن دە قازاقشا قىزدىرعان. مەكتەپ جاسىنا كەلگەندە، ۇلىنىڭ قازاق تىلىنە دەگەن قابىلەتىن ەسكەرگەن اتا-اناسى ويلانباستان قازاق مەكتەبىنە بەرگەن. 2017 جىلى وتباسىمەن بىرگە استاناعا قونىس اۋدارعان. ول جەردە دە قازاق مەكتەبىنە بارىپ، ورتا مەكتەپتى سول جەردە ءتامامداعان.
بىلتىرعى مامىر ايىندا بانادر اسكەري بورىشىن وتەۋگە ۇلتتىق ۇلان قاتارىنا شاقىرىلادى. ءبىر ايلىق دايىندىقتى تولىق كولەمدە اياقتاپ، اسكەري انت قابىلداعان سارباز جاۋىنگەرلىك بولىنىسكە بولىنەدى. قازىرگى كەزدە اسكەري قىزمەتتى جەتە مەڭگەرگەن سارباز، بولىمدەگى ۇلگىلى اسكەري قىزمەتشى، سەنىمدى دوس، مىندەتىنە ادال جاۋىنگەر.
اسكەرگە دەيىن كاۆكاز حالقىنىڭ بيىنە دەگەن قۇشتارلىعىمەن 6 جاسىنان باستاپ لەزگينكا بيىمەن اينالىسقان. ءبيدىڭ قىر-سىرىن جەتىك مەڭگەرگەن بانادر 17 جاسىندا استانا قالاسىندا جەكە بي زالىن اشىپ، وسى بي تۇرىنەن ءدارىس بەرگەن. سونداي-اق، 18 جاسىنان «Tikتok» الەۋمەتتىك جەلىسىندە ءوزىنىڭ لەزگينكا بيىمەن تانىمال بولعان.
– ءوزىم كوپۇلتتى وتباسىنان شىققانمىن. وتباسىمىز ۋكراين، ءازىربايجان، تۇرىك ۇلتىنىڭ وكىلدەرىنەن قۇرالعان. شاڭىراعىمىزدا ءبارىمىز دەرلىك تەك قازاقشا سويلەسەمىز. كورشىلەرىمىزدىڭ ءبارى قازاقتار بولدى. اۋاسىن جۇتىپ، سۋىن ءىشىپ وتىرعان ەلىن قۇرمەتتەيتىن، قادىرلەيتىن ادام ءتىلدى دە تەز مەڭگەرەدى دەپ بىلەمىن. وڭتۇستىكتىڭ، ونىڭ ىشىندە قازاقىلىقتىڭ ءيىسى اڭقىپ تۇرعان شىمكەنتتىڭ توپىراعى مەن اۋاسى قازاق ءتىلىن ەركىن مەڭگەرىپ الۋىما اسەر ەتكەن بولار. مەنىڭ ءتىلىم دە، ءدىنىم دە، جانىم دا – تازا قازاق. مەن ءوز ەلىمدە ەركىن ءومىر ءسۇرىپ جاتقانىم ءۇشىن قازاقستان حالقىنا، وتباسىمدا مەنى شەكسىز جاقسى كورىپ، بار مەيىرىمىمەن تاربيەلەگەن اتا-اناما، مەنى قولداپ، اركەز قاسىمدا جۇرگەن دوستارىما، قارۋلاستارىما جانە قۇقىقتىق ءتارتىپ اسكەرى – ۇلتتىق ۇلانعا ۇلكەن العىسىمدى ايتامىن. جاقىندارىمىزعا جاقسىلىق جاساپ، بىر-بىرىمىزگە العىس ايتىپ جۇرەيىك، – دەيدى قاتارداعى جاۋىنگەر بانادر يسايەۆ.
بانادردىڭ الماتىدا وتكەرىپ جاتقان اسكەري قىزمەتىن اياقتاۋىنا ءۇش اي قالىپتى. باعىندىرار بەلەسى دە، شىعار شىڭى دا ءالى الدا دەپ بىلەمىز. ءبىز ونىڭ وتباسىنا امان-ەسەن ورالىپ، ماقساتىنا جەتۋىنە تىلەك قوسامىز.