تازالىق ساقتاماۋ: الماتىلىق كاسىپكەرلەرگە ءتيىستى تازالاۋ جۇمىستارىن جۇرگىزبەگەنى ءۇشىن ايىپپۇل سالىندى
الماتى قالاسى اكىمىنىڭ ورىنباسارى بەيبىت شاحانوۆ قىس ماۋسىمىنا دايىندىق اياسىندا كوممۋنالدىق قىزمەتتەردىڭ كوشەلەر مەن اۋلالاردى تازالاۋ جۇمىستارىن تەكسەردى، دەپ حابارلايدى aqshamnews.kz
ارالاۋ بارىسىندا ماگيسترالدىق كوشەلەردە، اۋلالاردا، سونداي-اق كوممەرسيالىق نىسانداردىڭ اۋماقتارىندا جۇرگىزىلگەن تازالىق جۇمىستارى تەكسەرىلدى.
سونىڭ ناتيجەسىندە عيماراتتارىنىڭ اينالاسىن ءتيىستى دەڭگەيدە تازالاماعانى ءۇشىن جەتى كوممەرسيالىق ۇيىم: ەكى Degirmen ءدامحاناسى، Starbucks، «سۇلتان»، Bay جانە Nanduk ءدامحانالارى، سونداي-اق Kimex دۇكەنى 140 اەك كولەمىندە ايىپپۇل تولەيتىن بولدى. جالپى 516 880 تەڭگە ايىپپۇل سالىندى.
سونىمەن قاتار، مەدەۋ اۋدانىنداعى تازارتىلماعان اۋلا ءۇشىن مەردىگەر ۇيىمعا قاتىستى 20 اەك ايىپپۇل سالۋ جونىندە اكىمشىلىك حاتتاما تولتىرىلدى.
ايتا كەتۋ كەرەك، تازالىق اپتالىعى اياسىندا «الماتى تازالىق» كوممۋنالدىق كاسىپورنىنىڭ قىزمەتكەرلەرى كۇشەيتىلگەن رەجيمدە جۇمىس ىستەپ، قالانى قىس مەزگىلىنە دايىنداۋدا. اتاپ ايتقاندا، تۇسكەن جاپىراقتار مەن قوقىستاردى جيناپ، ارىق جۇيەلەرىن تازالاۋ جانە اۋلالاردى كورىكتەندىرۋ جۇمىستارى قولعا الىندى.
سانيتارلىق تازالىق جۇمىستارى جالپى اۋدانى 25،1 ملن شارشى مەتر بولاتىن 2 318 كوشەنى، ۇزىندىعى 2 777 كم اۋماقتى قامتيدى. قىسقى جۇمىستاردى ءتيىمدى اتقارۋ ءۇشىن 841 بىرلىك تەحنيكا مەن 1 400 جۇمىسشى جۇمىلدىرىلادى. سونداي-اق، «الماتى تازالىق» اۆتوپاركىنە 32 جاڭا زاماناۋي تەحنيكا قوسىلدى.
ەستەرىڭىزگە سالا كەتەيىك، بيىلدان باستاپ الماتى كاسىپكەرلەرىنە كورىكتەندىرۋ ءتولقۇجاتى بەرىلەدى. قۇجاتقا سايكەس، ولار «تازا قازاقستان» باعدارلاماسى اياسىندا اۋماقتارىنداعى تازالىقتى قامتاماسىز ەتۋگە مىندەتتى. كورىكتەندىرۋ ءتولقۇجاتىندا اباتتاندىرۋ مەن سانيتارلىق تازالىقتى ساقتاۋ، قوقىس جاشىكتەرىمەن قامتاماسىز ەتۋ، شاعىن ساۋلەت نىساندارىنىڭ دۇرىستىعىن قاداعالاۋ تالاپتارى كورسەتىلگەن. تالاپتاردى بۇزعان جاعدايدا كاسىپكەرلەرگە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 505-بابىنا سايكەس اكىمشىلىك جاۋاپكەرشىلىك جۇكتەلەدى.