2022 جىلى 4 جوبانى ىسكە اسىرۋ جوسپارلانۋدا.
بالقاش كولىنە ءقاۋىپ ءتونىپ تۇرعان جوق، دەيدى قازاقستاندىق ەكولوگتار. كولدى ساقتاۋ ماقساتىندا ارنايى جوسپار ازىرلەندى، دەپ حابارلايدى Almaty-akshamy.kz.
مامانداردىڭ حابارلاۋىنشا، كولدىڭ تۇراقتى دەڭگەيدە ساقتالۋىنا (بالتىق جۇيەسىنىڭ 341 م بەلگىسىنەن تومەن ەمەس) جىل سايىن وعان 12 ملرد م3 سۋ اعىنىنىڭ قۇيىلۋىمەن كەپىلدىك بەرىلەدى. بۇل رەتتە اعىننىڭ 70%-ى ترانسشەكارالىق ىلە وزەنى ارقىلى كەلەدى. گيدرولوگيالىق دەرەكتەردى تالداۋ كورسەتكەندەي، ىلە وزەنىنىڭ اعىسى 2001 جىلدان 2020 جىلعا دەيىن 13،8 ملرد م3 قۇرادى. كولگە جىل سايىن شامامەن 20 ملرد م3 سۋ اعىنى ءقۇيىلادى، ىلەدەن كەيىنگى ەڭ ءىرى وزەندەر - قاراتال، اقسۋ، لەپسى، اياگوز وزەندەرى.
«مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، الماتى وبلىسىنىڭ اكىمدىگى جانە باسقا دا ۋاكىلەتتى مەملەكەتتىك ورگاندارمەن بىرلەسىپ بالقاش كولىن ساقتاۋ بويىنشا ارنايى جوسپار ازىرلەندى. جوسپاردا ونەركاسىپتىك كاسىپورىنداردىڭ زياندى توگىندىلەرىن قىسقارتۋ، ىلە وزەنى اتىراۋىنىڭ اعىندارىنداعى تازارتۋ جانە ءتۇبىن تەرەڭدەتۋ جۇمىستارى، يرريگاسيالىق جانە درەناجدىق جۇيەلەردى قايتا قۇرۋ جانە سۋدى ۇنەمدەۋ ءۇشىن ىلە وزەنى باسسەينىندە گيدرومەليوراتيۆتىك جۇيەلەردى قايتا جاڭارتۋ جانە سۋارۋدىڭ زاماناۋي تەحنولوگيالارىن ەنگىزۋ، ىلە وزەنى اعىنىنىڭ اۋىتقۋىن ازايتۋ ءۇشىن قاپشاعاي سۋ ەلەكتر ستانسياسىىڭ كەربۇلاق كونتررەتتەگىشىن سالۋ جونىندەگى ءىس-شارالار كوزدەلگەن»، – دەپ حابارلايدى ەكولوگيا، گەولوگيا جانە تابيعي رەسۋرستار مينيسترلىگىنىڭ باسپاسوز-قىزمەتى.
بۇل ءىس-شارالار ازىرلەنىپ جاتقان سۋ رەسۋرستارىن باسقارۋ جونىندەگى ۇلتتىق جوبا شەڭبەرىندە ىسكە اسىرىلاتىن بولادى.
سونداي-اق، بالقاش كولىنىڭ ەكولوگيالىق جاي-كۇيىن جاقسارتۋ ماقساتىندا جانە ىلە وزەنى اتىراۋىنداعى بالىق قورلارىنىڭ ونىمدىلىگىن قالپىنا كەلتىرۋ جانە ودان ءارى مولايتۋ ءۇشىن 2006 جىلدان باستاپ جىل سايىن الماتى وبلىسىنىڭ اكىمدىگى كول اتىراۋىنداعى ارنالاردى كەڭەيتۋدى جانە تەرەڭدەتۋدى جۇرگىزۋدە.
2020 جىلى بالقاشقا قۇياتىن ارنالاردى مەحانيكالىق تازالاۋ جانە تەرەڭدەتۋ بويىنشا 5 جوبا ىسكە اسىرىلدى. بيىل ىلە وزەنى سۋىنىڭ كولگە قۇيۋىن ارتتىرۋ ءۇشىن 4 نىسان بويىنشا جۇمىستار جۇرگىزىلۋدە. 2022 جىلى 4 جوبانى ىسكە اسىرۋ جوسپارلانۋدا.