بالەتمەيستەر ايۋحانوۆ تۋعان كۇنىندە «گۋدۋللا - مات ەسمەرالدى» بالەتىنىڭ تۇساۋىن كەسەدى

بۇگىن - ق ر حالىق ءارتىسى بولات ايۋحانوۆتىڭ تۋعان كۇنى. 

قازاق بالەت ونەرىنىڭ تاريحىندا وشپەس ءىز قالدىرعان ەلەۋلى تۇلعا، ق ر حالىق ءارتىسى بولات ايۋحانوۆ ءوزىنىڭ تۋعان كۇنىندە الماتى قالاسىنىڭ تۇرعىندارى مەن قوناقتارىن «گۋدۋللا - مات ەسمەرالدى» بالەتىنىڭ تۇساۋكەسەرىمەن قۋانتپاق، دەپ حابارلايدى Almaty-akshamy.kz.

بولات عازيز ۇلىنىڭ جەتەكشىلىگىمەن «الماتىنىڭ جاس بالەتى» ۇجىمى الەمنىڭ تۇكپىر-تۇكپىرىندەگى كورەرمەننىڭ جوعارى باعاسىنا يە بولعان. ونىڭ «مەنىڭ بالەتىم»، «سەزىمدەر ءومىربايانى» جانە تاعى باسقا كىتاپتارى وقىرمان اراسىندا كەڭىنەن تانىمال.

ايتا كەتسەك، بولات عازيز ۇلى ايۋحانوۆ 1938 جىلى 13 قىركۇيەكتە سەمەي قالاسىندا تۋعان. ا.ۆ. لۋناچارسكيي اتىنداعى ماسكەۋ تەاتر ونەرى ينستيتۋتىنىڭ بالەتمەيستەرلىك فاكۋلتەتىن بىتىرگەن. ق ر مەملەكەتتىك اكادەميالىق بي تەاترىنىڭ نەگىزىن قالاۋشى ءارى تۇراقتى جەتەكشىسى، ق ر حالىق ءارتىسى، ايگىلى حورەوگراف، پروفەسسور. «قۇرمەت بەلگىسى»، ەڭبەك قىزىل تۋ وردەندەرىمەن ماراپاتتالعان. «پلاتينالىق تارلان» (2000)، «التىن ادام» (2008) سىيلىقتارىنىڭ، مەملەكەتتىك سىيلىقتاردىڭ لاۋرەاتى.

Almaty-akshamy.kz ۇجىمى بولات عازيزۇلىن تۋعان كۇنىمەن قۇتتىقتاپ، شىعارماشىلىق تابىس تىلەيدى. 

تۇساۋكەسەر 13 قىركۇيەكتە، ساعات 19.00-دە الماتىداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا وتەدى.