الماتىلىقتاردىڭ التىندارى مەن اقشاسىن ۇرلادى دەگەن كۇدىكپەن ەر-ازامات ۇستالدى

قازىرگى ۋاقىتتا كۇدىكتى ۋاقىتشا ۇستاۋ يزولياتورىندا قاماۋدا وتىر.

الماتى پوليسەيلەرى قالا تۇرعىندارىنىڭ پاتەرلەرىن تونادى دەگەن كۇدىكپەن 30 جاستاعى ەر-ازاماتتى ۇستادى، دەپ حابارلادى Almaty-akshamy.kz.

ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، 30 جاستاعى الماتى وبلىسىنىڭ تۇرعىنى بىرنەشە رەت ۇرلىق جاسادى دەگەن كۇدىككە ىلىنگەن.

«پوليسياعا شاھار تۇرعىندارىنان پاتەرلەرى تونالدى دەگەن بىرنەشە ارىز كەلىپ ءتۇستى. نەگىزىندە، “قوناقتار” التىن بۇيىمداردى، اقشانى العان. بوتەن ادامداردىڭ ۇيلەرى ءبىر تاسىلمەن جانە تەك كۇندىزگى ۋاقىتتا اشىلدى. جۇرگىزىلگەن ىزدەستىرۋ ءىس-شارالارىنىڭ ناتيجەسىندە ۇرلىق جاسادى دەگەن كۇدىكپەن قۇلىپتاردى اشاتىن قۇرالدارى بار، بۇرىن سوتتالعان ەر ادام ۇستالدى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

ق ر قك-نىڭ 188-بابى 3-بولىگى بويىنشا جۇرگىزىلگەن سوتقا دەيىنگى تەرگەۋ بارىسىندا ۇستالعان ازاماتتىڭ پاتەر ۇرلىعىنىڭ وسىعان ۇقساس ءتورت ەپيزودىنا قاتىسى بار ەكەندىگى انىقتالدى. قازىرگى ۋاقىتتا كۇدىكتى ۋاقىتشا ۇستاۋ يزولياتورىندا قاماۋدا وتىر.