ەرجان باباقۇماروۆ الماتىداعى الەۋمەتتىك سالانىڭ دامۋى جايىندا اڭگىمەلەدى
الماتى قالاسى قوعامدىق كەڭەسىنىڭ وتىرىسىندا قالا اكىمىنىڭ ورىنباسارى ەرجان باباقۇماروۆ شاھاردا دەنساۋلىق ساقتاۋ، ءبىلىم بەرۋ، سپورت جانە مادەنيەت جۇيەلەرىن دامىتۋ بويىنشا قانداي جۇمىستار جۇرگىزىلىپ جاتقانىن ايتتى، دەپ حابارلايدى Almaty-akshamy.kz
قازىرگى كەزەڭدە دەنساۋلىق ساقتاۋ جۇيەسى – باستى ءارى نەگىزگى باسىمدىق. جالپى، كوروناۆيرۋستىق ينفەكسياعا قارسى تۇرۋ مودەلى قۇرىلىپ، ونىڭ تاجىريبەسى بۇكىل ەل بويىنشا ەسكەرىلدى. مودەل "جەدەل جاردەمنىڭ" ءرولىن وزگەرتۋگە، جۇقپالى اۋرۋحانالاردىڭ جۇمىسىن جۇقتىرعانداردىڭ جاعدايى مەن قالاداعى ىندەتتىڭ قارقىنىنا بايلانىستى توسەك-ورىندارىن باسقارۋ ءۇشىن ءۇش ەشەلونعا جىكتەۋگە قاتىستى. بمجك جۇمىسى قايتا قۇرىلىپ، وندا 364 ءموبيلدى بريگادا توپتاستىرىلدى، ۋچاسكەلىك دارىگەرلەردىڭ الەۋەتى كۇشەيتىلدى. وتكەن جىلى قۇرىلعان تەلەمەديسينا ورتالىعى ارقىلى پاسيەنتتەردى ۇيدە ەمدەۋگە باقىلاۋ جاسالدى. ولىممەن كۇرەسۋ ءۇشىن ءبىرىڭعاي رەانيماسيالىق توپ جۇمىس ىستەيدى. پاسيەنتتەردى ۋاقتىلى دياگنوستيكالاۋدى قامتاماسىز ەتەتىن 28 كت–ورتالىعىنان تۇراتىن جالپىقالالىق جەلى قۇرىلدى.
قابىلدانعان شارالار ناتيجەسى ينفەكسيانىڭ ءتورت تولقىنىن جەڭۋگە مۇمكىندىك بەردى. ءتورتىنشى تولقىن كەزەڭىندە 10 مىڭعا جۋىق ينفەكسيالىق توسەك دايىندالىپ، ولاردىڭ 9 مىڭعا جۋىعى ىسكە قوسىلدى. دەلتا تولقىنىنىڭ شىڭىندا ولاردىڭ جۇكتەمەسى 70%-دان اسپادى. اكىمدىك ءوز رەزەرۆىندە 1000 توسەك-ورىن ۇستادى. دارىلىك پرەپاراتتار مەن جەكە قورعانۋ قۇرالدارى قورى جەتكىلىكتى، قامتاماسىز ەتۋدە ىركىلىستەر بولعان جوق.
دەنساۋلىق ساقتاۋ جۇيەسى مەديسينالىق قىزمەت ساپاسىن، جۇمىس ستاندارتتارىن ارتتىرۋ جانە قالا تۇرعىندارىنىڭ دەنساۋلىعىن قورعاۋمەن بايلانىستى باسقا دا ماسەلەلەردىڭ شەشىمى بويىنشا جۇمىستاردى جالعاستىرۋدا.
ءبىلىم بەرۋ سالاسىنداعى نەگىزگى مىندەت – بالاباقشالار مەن مەكتەپتەردەگى كەزەكتىلىكتى تومەندەتۋ. بۇل باعىتتا 640 ورىندى 4 مەملەكەتتىك بالاباقشانىڭ قۇرىلىسى جۇرگىزىلۋدە. اعىمداعى جىلى 12600 ورىندى 8 مەكتەپ سالىنۋدا: 5100 ورىندى 3 مەكتەپ بيىلعى جىلدىڭ جەلتوقسان ايىندا، قالعان 5 مەكتەپ 2022 جىلدىڭ 2 توقسانىندا پايدالانۋعا بەرىلەدى. سونىمەن قاتار، مەكتەپتەرگە 8263 ورىنعا ارنالعان 17 قوسىمشا كورپۋس سالىنۋدا، ونىڭ 9-ىندا قۇرىلىس جۇمىستارى اياقتالدى، ال قالعان 8ء-ى 2021 جىلدىڭ قازان ايىنىڭ سوڭىنا دەيىن قولدانىسقا بەرىلەدى. جالپى، جىل سوڭىنا دەيىن جالپى سانى 16 مىڭعا جۋىق وقۋشى ورنى بار 31 ءبىلىم بەرۋ نىسانى پايدالانۋعا بەرىلەدى.
ودان بولەك، بالالاردى قوسىمشا ءبىلىم بەرۋمەن قامتۋدى كەڭەيتۋ ءۇشىن يننوۆاسيالىق شىعارماشىلىقتىڭ ەكى ورتالىعى سالىنادى، 10 مىڭ بالاعا ارنالعان وقۋشىلار سارايى جاڭعىرتىلادى. اعىمداعى جىلدىڭ سوڭىنا دەيىن 73 فۋتبول، 63 ۆولەيبول جانە باسكەتبول الاڭدارى، سونداي-اق ۆوركاۋت ايماقتارى مەن جۇگىرۋ جولدارى بار 61 مەكتەپ جانىنداعى سپورت نىساندارىن جاڭعىرتۋ اياقتالادى. سول ارقىلى الماتى قالاسى مەكتەپتەرىنىڭ سپورت زالدارىمەن جانە سپورت قۇرال-جابدىقتارىمەن قامتاماسىز ەتىلۋ كورسەتكىشى 100%-دى قۇراماق. بۇل ەلىمىز بويىنشا ەڭ ۇزدىك كورسەتكىش بولارى حاق.
بۇقارالىق سپورتتى دامىتۋ بويىنشا كەشەندى جۇمىستار جۇرگىزىلۋدە. بيىل جابىق سپورت نىساندارىنىڭ قۇرىلىسى ەسەلەپ ۇلعايتىلدى. 7 سپورت نىسانىنىڭ قۇرىلىس-مونتاج جۇمىستارى جۇرگىزىلۋدە، ولاردىڭ 6-ۋى – دەنە شىنىقتىرۋ-ساۋىقتىرۋ كەشەنى جانە 1ء-ۋى – تەننيس ورتالىعى. اعىمداعى جىلى جاڭا دەنە شىنىقتىرۋ-ساۋىقتىرۋ كەشەندەرىن ورنالاستىرۋ ءۇشىن 14 قوسىمشا ۋچاسكە ءبولىندى.
كاسىبي سپورت كلۋبتارىن ۇستاۋعا، ولاردى بۇقارالىق سپورتتى دامىتۋعا قايتا ءبولۋ ارقىلى قارجىلىق شىعىندار قىسقارعانىن اتاپ ءوتۋ ماڭىزدى. باستى مىندەت – جىل سوڭىنا دەيىن حالىقتىڭ كەمىندە 35%-ىن سپورتپەن قامتۋ. جان باسىنا قارجىلاندىرۋ تەتىگى ارقىلى جىل سوڭىنا دەيىن سپورتپەن جالپى قامتۋ مولشەرى 40 مىڭعا جۋىق بالانى قۇرايتىن بولادى. قالانىڭ بارلىق اۋداندارىندا 8000-نان استام ادامدى قامتيتىن تەگىن سپورت سەكسيالارى مەن ۇيىرمەلەرى بار 100 دەمالىس ورتالىعى جۇمىس ىستەيدى. 2023 جىلعا قاراي ورتالىقتاردى 200-گە دەيىن ۇلعايتۋ جوسپارلانعان.
مادەنيەت سالاسىندا مەملەكەتتىك شىعارماشىلىق تاپسىرىستى جان باسىنا قارجىلاندىرۋ جوباسى ەنگىزىلدى، ونىڭ اياسىندا 4 جاستان 17 جاسقا دەيىنگى بالالار شىعارماشىلىق ۇيىرمەلەرگە قاتىساتىن بولادى. جىل سوڭىنا دەيىن بالالار مەن جاسوسپىرىمدەرگە قاتىستى مەملەكەتتىك شىعارماشىلىق تاپسىرىستى جان باسىنا قارجىلاندىرۋ 10 000-نان استام ادامدى قۇرايدى.