«Balapan» ارناسىنىڭ پروديۋسەرى بالالارعا ارنالعان كونتەنت قۇرۋ ماسەلەسىن كوتەردى
«Balapan» تەلەارناسىنىڭ باس پروديۋسەرى ساندۋعاش كەنجەبايەۆا تەلەارنالار بالالارعا ارنالعان كونتەنتكە كەم دەگەندە ەكى ساعات ەفير ۋاقىتىن ءبولۋى كەرەك دەپ سانايدى. مۇنداي ۇسىنىس قازاقستان حالقى اسسامبلەياسىنىڭ كەڭەيتىلگەن وتىرىسىندا ايتىلدى، دەپ حابارلايدى Almaty-akshamy.kz.
«Balapan» - جاڭا تۋعان سابيدەن باستاپ 8 جاسقا دەيىنگى بالالارعا ارنالعان تەلەارنا. بالانىڭ ساناسى تال بەسىكتەن مەكتەپ تابالدىرىعىن اتتاعانعا دەيىن قالىپتاسادى. سوندىقتان، «Balapan»-نىڭ بالا تاربيەسىندەگى ورنى وراسان. دەگەنمەن، ءبىر ارنا بارلىق بالانى قامتۋى مۇمكىن ەمەس. وسىعان وراي مەنىڭ بىرنەشە ۇسىنىسىم بار. بىرىنشىدەن، بۇكىل الەم ءتول تاريحىن انيماسيا ارقىلى تانىتىپ وتىر. بۇل - ءتۋريزمدى دامىتۋدىڭ دا العىشارتتارىنىڭ ءبىرى. ءبىز، اسسامبلەيانىڭ انالار كەڭەسىمەن بىرلەسىپ الەۋمەتتىك تانىمدىق روليكتەر ءتۇسىرىپ، حالقىمىزدىڭ تاريحىن، مادەنيەتىن تانىتاتىن انيماسيالىق جوبالار جاساۋدى جوسپارلاپ وتىرمىز. بۇگىندە ءبىزدىڭ ارنا ەفيرىنىڭ 80 پايىزىن انيماسيالىق ءونىم تولتىرىپ وتىر. ونىڭ 30 پايىزى عانا - ءتول ءونىم، قالعان 50 پايىزىن شەتەلدىك مۋلتحيكايالارمەن تولتىرۋعا ءماجبۇرمىز»، - دەدى ول.
وسى ورايدا تەلەارنانىڭ باس پروديۋسەرى ەل پرەزيدەنتىنەن «Balapan»-نىڭ انيماسيالىق جوبالار ءوندىرىسىن ارتتىرۋعا ىقپال ەتۋدى ءوتىندى.
«ەكىنشىدەن، قازاقستاندا 9-دان 18 جاسقا دەيىنگى بالالار كورەتىن ارنا جوق. ياعني، جاسوسپىرىمدەردىڭ تانىمىن قالىپتاستىراتىن سەنىمدى پلاتفورما جوق دەۋگە بولادى. سوندىقتان، مەملەكەتتىك تاپسىرىسپەن جۇمىس ىستەيتىن تەلەارنالار بالالارعا ارنالعان كونتەنتكە كەم دەگەندە ەكى ساعات ەفير ۋاقىتىن ءبولۋدى سۇرايمىز»،- دەدى ساندۋعاش كەنجەبايەۆا.